КЕРЧОМЪЯЫН

* Керчомъяын лыддьыссьö 524 овмöс да 1464 морт, но збыльвылас 315 овмöсын олö 1164 морт.

* Сиктын 741 нывбаба да 723 айлов. Уджалö 300 морт, оз уджавны 275-öн. 235 пенсионер, 78 вермытöм, ыджыд арлыда 23 морт. Медся ыджыд арлыдаöсь Анастасия Андреевна Тарабукина да Матрёна Ивановна Матвеева ― кыкнанныслы 90 арöс.

* Кольöм воын чужис 8 кага, кулìс 12 морт.

* Сиктын 9 салдат дöва, тылса 27 уджалысь, уна челядя 12 мам.

* Армияын служитöны квайтöн, воисны бöр сэтысь нёльöн. Тыш кыптöминъясын вöлìны кöкъямысöн, бырöдìсны Чернобыльса лоöмтор кыкöн.

* Январын чужис семья. Гöтырöн да верöсöн лоисны Яна Валентиновна Размыслова да Иван Леонидович Ракин.

* Локтìсны овны кöкъямысöн, мунìсны витöн.

* Сиктын эмöсь администрация, шöр школа, бурдöдчанìн, культура керка, почталöн юкöн, лесничество, ветеринарнöй участок, кык сад, биысь дорйысьяслöн депо, 8 вузасянìн, «Коми тепловая компаниялöн» участок.

* Крестьянин овмöс кутö Н.М.Шахова, видзö порсьясöс да öти мöскöс. Заптö вöр да могмöдö пескöн И.В.Игнатов. Пилитöны тьöс-плака Н.В.Катаев да М.А.Ахмедов.

* Йöз олöны ас керкаясын да асэмбуралöм кык патераа 7 керкаын.

* Совхоз бырöм бöрын техника да видз-му машинаяс босьтìсны сэтчöс уджалысьяс. Öнì сиктын 32 трактор да 92 машина.

* Шöр школалы тырис 150 во. Сэнì таво велöдчисны 123-öн. Тöдöмлунъяс сетìс 20 велöдысь.

* Садъясö ветлöны 65-öн. Найöс видзö 31 уджалысь.

* Чинö скöт лыд. Талун сиктын 112 мöс, 82 кукань, 17 öшпи, 40 ыж, 35 кöза да 7 вöв.

* Киподтуйöн да сямлунöн нималöны Георгий Николаевич Траилин, Нина Антоновна Лодыгина, Николай Иванович Булышев, Дмитрий Иванович Ваддоров, Дмитрий Егорович Тарабукин.

* Радейтöны вöравны да кыйны чери Владимир Алексеевич Тарабукин, Николай Алексеевич Гичев, Иван Алексеевич Лодыгинлöн да Николай Алексеевич Тарабукинлöн семьяяс.

* Медся ёна вотчöны Владимир Дмитриевич Жикин, Татьяна Анатольевна Логинова, Нина Ивановна Титова да Дмитрий Борисович Гилев.

* Районын нималöны олöма йöзлöн «Кыпыд лов» да челядьлöн «Козин» котыръяс. Бöръяыслы 2011-öд воын тырис 20 во.

* Керчомъяын кык во пиын öтчыд нуöдлöны «Пыжа гаж», код вылö волöны весиг юркарса олысьяс. Таво вад дорын жö медводдзаысь котыртлìсны том йöзлысь «Медбöръя герой» гаж.

* Сиктса юралысь Л.Е.Траилиналöн да ветеранъяслöн котырöн веськöдлысь Н.А.Самариналöн водзмöстчöмöн сиктын воссяс музей. Сы улö жыръяс торйöдасны кык судта вöвлöм школаысь, кодì сикт шöрын да зэв кивыв лоö керчомъясалы.

* Ыджыд Кадамöс кöртымалìс ас вылö уджалысь Н.А.Гичев. Лэптìс сэнì олан керка, пывсян да мукöдтор. Шойччыны волöны весиг суйöр сайысь. Н.А.Гичев гöтырыскöд ветлìсны Финляндияö, медым босьтны туризм сöвмöдöм кузя опыт.

* Лоисны бурланьö вежсьöмъяс. Вужвыйöн дзоньталìсны бурдöдчанìн да Кулöмдìнса сельполысь лавка. Дзоньталìсны и школалысь вевтсö. Öнì дзоньталöны кык судта вöвлöм школа. Сэтчö садйысь вуджас сиктса администрация. Сетìсны кöрым заптан техника Н.М.Шаховалöн крестьянин овмöслы.

Николай ЛЮТОЕВ.