ЮРСИКТЛЫСЬ ЧУЖÖМБАН ВЫЛЬМÖДÖМÖН

Кулöмдìнса да районса войтырöдз вайöда, кыдзи ми юрсиктын кыпöдам керкаяс да мукöдтор, дöзьöритам-сöстöммöдам ассьыным ыджыд оланìннымöс.

Талун кежлö керка кыпöдысь 215 морт. Кольöм воын керкаясö пырис 212 семья. Таво кöсйö эштöдны керка 18 семья. Таво босьтчим сетавны керка кыпöдöм могысь му юкöнъяс Лугöвöй да Стрöительяслöн уличаяс вылысь. Урчитöма нин 60 юкöн. Öнì сиктса администрация дасьтìс документъяс, медым Северная-2 улича вылысь 30 юкöн вылö артыштöм водзтì гöран му вуджöдны стрöитчöм вылö.

Локтан воын колö босьтчыны да лöсьöдны Стрöительяс уличалöн войвылынджык керкаяс лэптанìнын ва да канализация трубаяс нюжöдöм могысь бала. Та вылö ковмас 4,5 миллион кымын шайт. Колö нуöдны корсьысян уджъяс Дорожнöй переулокын да сìдзжö лöсьöдны ва да канализация трубаяс нюжöдöм могысь бала. Тайö уджъяссö пыртöма 2013 во кежлö районлöн «Сöстöм ва» программаö. Кулöмдìнса администрация босьтчис уджö, медым лоис позяна нуöдны 1200 метр кузя канализация Ленинлöн улича вылын. Бала лöсьöдöм бöрын шыöдчам архитектура да стрöитчöм кузя министерствоö, медым тайö уджсö пыртìсны республикалöн «Сöстöм ва» программаö. Сэтчö пыртöма нин ва босьтанìн эштöдöм. Смета лöсьöдöм вылö ковмас 50 сюрс шайт. Пыртöма сìдзжö лёк ва сöстöммöданìнъяс вöчöм могысь балаяс, Полевая — Рабочая — Набережная уличаяс вылын ва провод нюжöдöм могысь бала дасьтöм.

Сиктын колö косявны 20 керка. Кольöм воын косялìм нёльöс, таво — кыкöс, кöсъям нöшта кыкöс. Таво сìдзжö косялìм 5 сарай.

Тулыснас сикт кывтыдын чукöртлìм скöта йöзöс, сёрнитìм сìйöс видзöм йылысь, урчитìм йирсьöданìн, индìм кывкутысьöс. Катыдын йöз эз чукöртчывны. Танì скöтöс видзöны вöвлöм совхозлöн картаяс дорын. Абу котыртöма вöвъясöс видзöм, найö ветлöдлöны сикт кузя. Медым кыскисны кöзяинъяссö кывкутöмö, мöдöдлìм письмö пытшкöсса делöяслöн республикаса министерствоö. Йöзлы воча мунöмöн, лöсьöдìм Эжвалöн мöдлапöлын йирсьöдöм бöрын вöвъясöс йöртанìн.

Сиктын сöстöмлун кутöм могысь сувтöдìм 50 ыджыд контейнер. Сìдзжö вайим да сувтöдìм 40 урна, ставыс лоис 50. Коставлытöг уджалö куим сöстöммöдчысь, общественнöй удж вöчöмöн, öти морт идралö урнаяс. Тулыснас котыртìм сиктöс став йöзöн сöстöммöдöм, субботник вылö петавлìсны и котыръяс да ас вылö уджалысьяс. Июнь панасын вайим да пуктìм Великöй Отечественнöй войнаын усьöмъяслы пас, сбербанк дорын, Сöветскöй да Ленин уличаяслöн öтлаасянìнын пуктìм 700-ысь унджык дзоридз. Сìдзжö пуктìм пуяс Сöветскöй улича пöлöн судсянь сикт шöрöдз. Сиктлöн урчитöминъясö сувтöдìм юöртысь стендъяс.

Быд лун юрсиктын идралö кыдзи чорыд, сìдзи и кизьöр колясъяс «Север» котыр. Йöзсянь элясьöмъяс öнì абуöсь. Колö ньöбны колясъяс петкöдысь нöшта öти машина.

Июнь шöрын босьтчим лöсьöдны идöрлун лöп-ёг чукöртанìнын. Танì колö бергöдны зэв ыджыд удж, но вермам вöчны этша, сы вöсна мый абу сьöм. Уджъяс вöчöм бöрся оз на тырмы и асланым видзöдлас. Медся ыджыд майшöгöн лоö сìйö, мый татчö вайöны вöр пилитöм бöрын артмöм зэв уна коляс да местаыс öдйö тырö. Мöд места та могысь абу. Сиктын, Ленин уличалöн уна патераяса керкаясдорса кытшола туй бокын артмис аснаукöн лöсьöдöм нöшта лöп-ёг шыблаланìн. Сìйöс позьö идравны сöмын техника отсöгöн.

Май помын сöстöммöдìм шойна. Лöп-ёг меститöм могысь кодйим гуяс, сувтöдìм контейнеръяс, петкöдìм быдсяма лöпсö 12 машина. «Ю вöнь» уджö сюртчöмöн, июнь 2 лунö весалìм Эжвалысь берегсö, отсасисны уджалан лагерысь тыр арлыдтöмъяс.

Июнь 10 лунсянь ытшкам турун да борщевик. Удж мунö ньöжйö, сы вöсна мый сìйöс вöчны кöсйысь этша, ытшканъяс öтарö жугласьöны. Мöвпалам ньöбны выльöс, вынйöраöс.

Во чöж мунö туйяс бöрся дöзьöр. Кольöм воын тöв пансигöн «шонтìм» туй вомöналысь трубаяс, тулыснас ас кадö весалìм найöс да эз пурмыны, ва визувтìс лючки. Гожöмын некымынысь весалìм уличаяс няйтысь да бусысь. Кыкысь вичмöдлìс техника Кебанъёльса юралысь В.В.Зайцева, бöрынджык тайö уджсö кутìс вöчны «Север» котыр. Шыльöдìм му туйяс. Стрöительяслöн-2 да Лугöвöй уличаяс васöдöсь на, медводз колö лöсьöдны бульдозерöн.

Юöртìм аукцион, медым вольсавны кöжаöн кык улича. Та вылö мунас 500 сюрс шайт. Дасьтìм документъяс, медым дзоньтавны уличаяс да ветланìнъяс, тайö уджсö вöчöм вылö сёрнитчöм районса юралысь Д.А.Шатохинлöн кырымпасöн мöдöдöма республикаса туй агентствоö. Öнì туй кузя Коми компанияса специалистъяс дасьтöны öтувъя туйяс дзоньталöм вылö сметаяс, медым сетìсны субсидияяс. Сìдзжö дасьтыссьöны документъяс, медым субсидияяс вичмöдìсны öшиньяс улö матыстчанìнъяс дзоньталöм вылö. Лоас кö администрациялöн содтöд сьöм, то кöжаöн вольсалам медся жугласьöминъяс.

Июльын босьтчим лöсьöдны челядьлы ворсанìнъяс. Та кузя миянлы отсалö районса администрация, вештысьö пиломатериалъясысь да краскаясысь. Вöчасьöны тыр арлыдтöмъяс да томъяс. Июльын сìдзжö шыльöдасны районса администрациялöн керка сайысь эрд. Сэтчö вöчам челядьлы ыджыд ворсанìн. Мыйöн ваясны, пыр жö сувтöдам.

Сергей Рубан,

юрсиктса администрацияöн веськöдлысьлысь

могъяс олöмö пöртысь.