[ A+ ] /[ A- ]

Пасйисны районлысь лун

Эжва йывса олысьяс кыпыда пасйисны район котыртöмсянь 83 во тырöм. Та вылö ышöдìс и мича лун: асывсянь рытöдз дзирдалìс шондì.

Медшöр гаж вöлì юрсиктын. Йöз вöлìны районса культура керка водзын асывсянь сёр рытöдз. Кулöмдìнсаясöс да гöсьтъясöс чöсмöдлìсны шашлыкöн, пöжасöн, чай-кофеöн. Челядь ворсìсны пöльтöм каръясын, ветлöдлìсны электромобильясöн, вöчисны лыаысь кар, петкöдчисны унапöлöс конкурсъясын. Районса котыр ворсìс немечьяслöн котыркöд мачöн. Рытнас вöлì «Волöй, гöсьтъяс, миянö» гаж. Петкöдчисны районса медбур котыръяс.

Кулöмдìнсаясöс да гöсьтъясöс районлöн чужан лунöн чолöмалìс районса юралысь Д.А.Шатохин. Сìйö шуис, мый колö пасйыны зэв кыпыда. Талы эм подув: асвеськöдлöм донъялöм серти миян район 19 местасянь воöдчис öкмысöдöдз. Таво районса бюджетын медводдзаысь лоис миллиардысь унджык шайт. Тайö сетас позянлун ёнджыка стрöитчыны, бурмöдны йöзлысь олöм.

Районса юралысь висьталìс, мый июль 8 лунö пасйисны семьялысь лун. Сыкöд йитöдын «За любовь и верность» медальöн пасйисны Лебежнöйысь Иван Николаевич да Роза Дмитриевна Булышевъясöс, кодъяслöн вöлì зарни кöлысь. Найö быдтìсны да велöдìсны 6 челядьöс, ставныс олöны семьяясöн, лоисны бур йöзöн. Ыджыд арлыд вöсна гозъя локны эз вермыны, та вöсна медальсö сетìс налöн нывлы — Екатерина Ивановналы, кодì олö Кулöмдìнын.

Кулöмдìнса олысьясöс да гöсьтъясöс районлöн чужан лунöн сìдзжö чолöмалìс райсöветса председатель А.Н.Кондрашкин, юöртìс, мый май 17 лунö райсöветса депутатъяс гöлöсуйтìсны сы вöсна, медым миян земляк Сергей Петрович Каплинлы сетны «Кулöмдìн районса почётнöй олысь» ним. С.П.Каплинлы сетìсны диплом, удостоверение да сьöма приз, öшöдìсны лента. Д.А.Шатохин да А.Н.Кондрашкин пöся чолöмалìсны Сергей Петровичöс ыджыд ним сетöмöн. С.П.Каплин аттьöалìс сылысь уджсö вылö донъялöмысь.

Николай ЛЮТОЕВ.

Авторлöн снимок вылын: С.П.Каплинöс нимöдöм.

Комментарии:

Комментарии запрещены.

Свежий выпуск: 28 марта

Осторожно — мошенники!