[ A+ ] /[ A- ]

ТОМЪЯС ВАЖСÒ ОЗ ВУНÒДНЫ

Кольöм нэмлöн пансигöн миян республикаö вайисны мыждöм (репрессируйтöм) уна йöзöс, тшöтш и миян Кулöмдìн районö. Найö медсясö заптìсны вöр. Чужисны быдса посёлокъяс, кодъяс пиысь вель уна абу нин. Сöмын важ фотографияяс да олöма йöзлöн казьтылöмъяс тöдмöдöны сìйö оланìнъяскöд да кольöм кадкöд. Буретш важыскöд тöдмасьöм могысь Югыдъягса шöр школаысь велöдчысьяс история велöдысь Татьяна Михайловна Митинакöд ветлìсны вöвлöм Немскöй посёлокö. Сэнì абу нин ни öти керка, кöть овлìс некымын сё морт, вöлì весиг начальнöй школа. Посёлоксö тупкисны кольöм нэмса квайтымынöд воясын, йöзöс овмöдìсны мукöд посёлокъясö. На пиысь öти — Белоборск. Танì велöдчысьяс аддзысьлìсны вöвлöм «немсаяскöд», тöдмалìсны уна выльтор.

Висьтасис Ядвига Антоновна Фриске (Литке). Сìйöс татчö вайисны Великöй Отечественнöй война дырйи Карелияысь. Вöлì бухгалтерöн, посёлок тупкöм бöрын вуджис Белоборскö да сэнì уджалìс пенсияöдз. Казьтылìс: «Немскöйын олìм лöсьыда. Колö вöлì лоны комендантлы, но сìйöс некор эг аддзылöй. Сöмын корсюрö кодкö волìс базаысь. Но посёлокысь бокö мунны эз позь».

Вöлöмкö, сìйö локтìс татчö аслас лоан верöскöд öти баржа вылын, а сэки сìйöс весиг эз аддзыв. Найö олìсны шуд тöдöмöн да дыр. Йöз шулìсны: «Тайö гозъяыслöн век нимлун». Чужисны Неля да Владимир, кодъяс öнì карынöсь. Неважöн верöсыс эновтìс таладор югыдсö, эз ов Ядвига Антоновналöн 80 арöсöдз некымын тöлысь.

Посёлокöд ветлöдлöмöн, керкаясö да патераясö пыралöмöн, том йöз тöдмасисны нöшта Хмелёвъяслöн, Гришель-яслöн, Гассъяслöн, Кулиничьяслöн, Мишинъяслöн да мукöдъяслöн семьяяскöд. Нöшта ветлìсны Ындìнö. Нэм джын-йысь водзджык танì вöлì колхоз. Òнì зэв гажа видзьяс. «Мунам Египетö да кытчö, а öд ас муным медся гажа», — нимкодя шуис миянкöд ветлысь медсестра. Талун танì сулалö кык да джын метра судта крест. Сìйöс сувтöдлìсны 2007 воын. Висьталöм серти, репрессируйтöмъяс волìсны татчö, куньлìсны синъяссö да эновтлìсны таладор югыдсö. Лöсьöдлöмтор тайö али збыль — некод висьтавны эз куж. Томъяс краситìсны крест-сö да пуктìсны дзоридзьяс. Бöрынджык ветлöдлìсны видзьяс вывтì, увтасìнъясöд, лэччылìсны ю дорö, кыисны катшасинъясысь юркытшъяс.

Чукöртöмторъяс веськаласны Югыдъягса шко-лалöн музейö, кытчö вермас волыны быдöн.

Маргарита Генке.

Комментарии:

Комментарии запрещены.

Свежий выпуск: 28 марта

Осторожно — мошенники!