[ A+ ] /[ A- ]

БЫДÒНЛÒН АСЛАС ТУЙВИЗЬ

Абу гусятор, мый наркотикъяс ёна паськалìсны Россияын. А ёна-ö дурмöдчöны наöн миян районын, кутшöм видзöдлас та вылö районса олысьяслöн? Редакциялöн юал-öм вылö вочавидзисны:

Александр Владимирович ЛЮТОЕВ — шöр бурдöдчанìнысь врач-нарколог:

— Талун кежлö миян дорын учёт вылын наркоман абу. Кольöм воын вöлì öти, но сìйö мунìс районысь. Тестсистема отсöгöн 300 мортлысь видзöдлìм, дурмöдчисны-ö тöлысь чöжöн да кутшöм наркотикöн вöдитчисны. Быть видзöдлам военнöй вузъясö велöдчыны мунысьясöс, а сìдзжö военкоматлöн учёт вылö сувтысь 16 арöса зонъясöс, медкомиссия прöйдитысь 18 арöса войтырöс, найö кö асьнысö кутöны оз колана ногöн. Наркотикъясöн ваян лёктор йылысь сёрнитìм школаясын, 15 номера профтехучилищелöн Кебанъёльса филиалын, петкöдлìм сìдзжö фильм. Гöгöрвоöдìм, мый медбур — дзоньвидза олöм. Ме серти, лёкö сетчöмысь томуловöс медбура видзö семья, кöнì ыджыдалö пыдди пуктöм, öта-мöдöс гöгöрвоöм, отсасьöм да тöждысьöм, оз юны да уджалöны бать-мам.

Александр Иванович УДОРАТИН — том йöзлöн «Том кад» шöринöн веськöдлысь:

— Мед том войтыр эз шедны налькйö, оз ков гижны да висьтавны наркотик да дурмöдчанторъяс йылысь. Быттьö öлöдöмöн видзам лёкö сетчöмысь, а збыльвылас тöдмöдам, кыдзи да мыйöн дурмöдчыны. Ылì сикт-грездъясын, кытчö эз на во интернет, телевизор пыр петкöдлö оз став программаыс, колöкö, кодсюрöыс оз на и тöдны, мый сэтшöм наркотикыс. Òд тöдса: мыйысь öлöдам, сэтчö и кыскö. Школаын велöдчигöн гортö мунлìм сёрöн. Окотапырысь кольччылìм быдсяма кружокъяс да секцияяс вылö. Велöдчанìн вöлì мöд гортöн. Колö бергöдчыны важас. Томъясöс колö ышöдны дзоньвидза олöмö да бур оласногö, отсавны пöртны олöмö налысь мöвпъяс да кöсйöмъяс. Кольöм вося августын шыöдчи юрсиктса администрацияысь веськöдлысьлысь могъяс олöмö пöртысь Сергей Владимирович Рубан дорö турникъяс лöсьöдöм могысь. Пыр жö сетìс техника. Томъяскöд асьным вайим коланаторъяс да вöчим. Òнì на дорын век эмöсь йöз. Турникъяс сувтöдìм и Кулöмдìнса культура керка водзын. Сямлунсö петкöдлìсны нин кулöмдìнсаяс да кебанъёльсаяс. Турникъяс эмöсь Кебанъёльын, Югыдъягын, Дереваннöйö лöсьöдам Иван лунö. Ме дорö шыöдчис нывка, мый кöсйö велöдны йöктыны. Сыкöд матыстчим юрсиктса культура керкаöн весь-кöдлысьлысь могъяс олöмö пöртысь Елена Дмитриевна Гичева дорö. Сìйö мунìс воча. Òти том морт кöсйö восьтны радио. Òнì сыкöд лöсьöдам бала. Шöр библиотекалöн юöръяс сетан шöрин кык час кежлö нюжöдìс уджалан кад. Танì томъяс дон босьттöг вöдитчöны интернетöн. Быд сикт-грездын эмöсь кыпалысь йöз, сöмын колö налы отсавны. Оз кö артмы места вылын, мед шыöдчасны миян дорö либö райадминистрацияысь общественносьткöд да том йöзкöд уджалан котырö, отсалам.

Андрей Феликсович ГУЛЯЕВ — участкöвöй уполномоченнöй:

— Быд во май 14 лунсянь октябр 31 лунöдз водзсасям мак быдтысьяскöд. Дерт, öнì ёна он на казяв, тыдовтчас июльын дзоридзалìгöн. Сикт-грездъястì ветлöдлìгöн видзöдалам керка йöръяс. Казялам кö мак быдтöм, гöгöрвоöдам да öлöдам, мед нетшкасны. Унаöн нин дугöдчисны. Кольöм воын öлöдìм дас нёльысь, унджыкыс Кулöмдìнысь. Òти морт дорö матыстчылìм куимысь. Мак рöдмöдöм кузя уголовнöй делö эг панлöй.

Екатерина Николаевна КЛИМЧУК — Усинскын олысь:

— Медводдзаысь аддзылì наркоманöс Усинскса больничалöн терапия юкöнын. Сöныс пыктöма, резина кодь, сукмöм вир босьтны он вермы. Наркоман дорö волывлìс гöтырыс быдтасыскöд. Батьсö татшöмöн аддзöмöн öдвакö ыштас наркотик вылö. Мед томулов эз сетчыны лёкö, дзолясянь колö ышöд-ны быдсяма уджö. Ме Усинскын ветлöдла йöктан котырö. Мам-батькöд волывлöны и челядьыс, и внук-внучкаясыс. Колö паськыдджы-ка висьтавны дзоньвидза олöм йылысь, ёнджыка сöвмöдны спорт да культура.

Игорь Юрьевич РАСОВ — öзйылöмъясысь видзан Великопольеса часьтын кусöдчысь:

— Юöм ыджыдалö быд-лаын, а наркотикъясöн дурмöдчöм кузя лöнь на. Мед наркотик эз дзуг олöм, колö водзсасьны оз сёрнитöмöн, а уджöн. Дурмöдчöмö кыскысьяслы да наркотик вузалысьяслы колö тöдчымöн чорзьöдны закон да быть пöртны сìйöс олöмö. Урчитìсны, мед тыр арлыдтöм челядь эз ветлыны сёрöдз, а та бöрся некод оз видзöд.

Дмитрий Владимирович ШИХ — уголовнöй розыскса начальник:

— Кольöм воын дзескыдìнö пуксьöдìм наркотикъясöн öти вузасьысьöс. Вöлì öти дурмöдчысь да мунìс районысь. Ми туялам да пыр кутам видзöдлас улын, мед тайö лёкыс эз паськав миян районын. И тыр арлыдтöмъяслöн делöяс кузя котыр, и велöдан управление, и шöр бурдöдчанìн. Быд юкöн нуöдö наркотиккöд водз-сасян, лёкö сетчöмысь видзан туйвизь.

Марина ДАДАШОВА.

Комментарии:

Комментарии запрещены.

Свежий выпуск: 28 марта

Осторожно — мошенники!