[ A+ ] /[ A- ]

КЕРЧОМЪЯ

И.Л.Жеребцовлöн «Кöнì тэ олан» книга вылö ыстысьöмöн, пасъям, мый сиктöс медводдзаысь гижöма 1646 вося документъясын. Сэки вöлì сöмын öти овмöс, кöнì вöлìны Денис да Сысой Тимофеевичьяс (овныс пасйытöм). Видзöдöм серти, тайö вöлìны вöралысьяс, кодъяс локтìсны озыр пармаö, пуктìсны кер чом, кысянь и сиктлöн нимыс. Бöрынджык локтìсны мукöдъяс. 1678 воын сиктын вöлì нин 5 овмöс. Медся ыджыд семьяöн олìс Парфен Фёдорович Лодыгин, кодлысь пасйöмаöсь квайт пиöс, а öд, кыв шутöг, вöлìны и нывъяс. Лодыгин, а сìдзжö Лютоев, Ладанов, Золотарёв да мукöд «Керчомъяса» ова йöз локтìсны Сыктыв, Емдìн да Лузадор вожъясысь. Жикинъяс да Кузнецовъяс — рочысь петöм йöз, волìсны Соликамскысь да Сольвычегодскысь. Волìсны и Чердыньладорысь, налöн вöлì асланыс эскöм, шулìсны кержакъясöн.

1686 воын Керчомъяын лэптìсны пу вичко. Танì лоисны овмöсъяс поплöн, дьяклöн, пöнöмарлöн да просвирницалöн.

1720 воын танì вöлì 18 овмöс. 1859 воын олìс 1534 морт (230 овмöс), 1926 воын — 2296 морт (792 овмöс), 1989 воын — 1838 морт.

Овмöсъяслöн да йöзлöн лыд öтарö чинìс. Талун Керчомъяын лыддьыссьö 670 овмöс да 1446 морт, но збыльвылас олö 468 овмöсын сöмын 1246 морт.

Сиктын эмöсь администрация, школа, бурдöдчанìн, культура керка, почталöн юкöн, лесничество, куим детсад, 8 вузасянìн, «Тепловодоканаллöн» участок. Асшöр удж бергöдöны Нина Михайловна Шаховалöн крестьянин овмöс (видзöны 85 порсь да öти мöс), вöр пилитысь Николай Витальевич Катаев, вöр заптысь Игорь Владимирович Игнатов, öшинь-öдзöс да мукöдтор вöчалысь Георгий Николаевич Траилин, арсяньыс босьтчис рöдмöдны порсьясöс Антонина Ивановна Мингалёва.

Йöз видзöны ставсö 194 мöс да кукань, 23 порсь, 7 вöв. Бöръя кык воöн скöтлöн юр лыд тöдчымöн чинìс: пöрысь йöз кутны оз вермыны, а томъяс оз кöсйыны. Лишалана йöв иналöны Кулöмдìнса МТС-лы. Примитöны Светлана Андреевна Гичева да Мария Васильевна Напалкова. Во чöжöн инавлöны 70 тоннаöдз. Яй инасьö Кулöмдìнса видз-му рынок вылö, челядьлöн Зимстанса керкаö, школаö, больничаö да с.в. Этша инасис картупель — гуясын тырыс.

Бергöдчывны кö воддза кадö, то öтувъя овмöсъяс лыдын танì медводз вöлì коммуна, котыртчылìс 1931 воын. Кык во мысти котыртчис кöкъямыс колхоз. Нянь волìс сэтшöм бура, мый Керчомъяöс шулìсны мöд Украинаöн. 1939 воын Калинин нима колхозлы, кодöн юралìс Михаил Васильевич Шевелев, вичмöдìсны ВДНХ-лысь мöд тшупöда диплом.

1968 воын котыртчис совхоз. Медводдза директорöн вöлì Владимир Егорович Кузьчуткомов, парткомса секретарöн — Николай Кузьмич Лютоев. Йöз бурöн помнитöны мöд директор Валерий Егорович Мелехинöс, кодì кыпöдìс эз сöмын скöт картаяс, но и йöзлы оланìнъяс — кык патераа керкаяс.

Сиктöс нимöдысьыс уна. Бергöдчывны кö цардырся кадö, ветлöдлìс саридзьясöд-океанъясöд Тимофей Кузьмич Кипрушев, кодöс шулìсны Керчомъяса Одиссейöн. Локтìс Петроградысь большевик-матросöн да медводдза комбедöн веськöдлìс Александр Павлович Гичев. Гражданскöй войнаса героиняöн лоис Дарья Михайловна Кочанова. Война пансян воö котыртлìсны нывбаба-механизаторъяслысь дас морта бригада, и пенсия вылö петтöдзыс век трактористалìс Пелагея Ивановна Жикина. Ас кадö зэв бура уджавлìсны мöс лысьтысьяс Клавдия Александровна Гичева да Павла Филлиповна Воробьёва, кукань видзысь Павла Васильевна Кипрушева, мувыв удж вöчысь Матрёна Васильевна Кипрушева, трактористъяс Сергей Алексеевич Лютоев, Виталий Дмитриевич Попов, Дмитрий Иванович Ваддоров (леспромхоз), механик Ва-силий Николаевич Воробьёв, сиктсöвет исполкомса юралысь Александр Иванович Попов, сэтысь жö секретар Агафья Николаевна Панюкова, велöдысь-яс Анна Андреевна Попова, Вера Николаевна Пономарёва, Анна Васильевна Самарина, Евлампия Ивановна Та-рабукина, Степан Степанович Лопырев.

Дыр уджалìс участкöвöйöн Алексей Павлинович Катаев. Медводдзаöн босьтчылìс уджавны социальнöй уджалысьöн Надежда Васильевна Шахова. 20 воысь нин дыр администрацияын Андрей Александрович Тарабукин, öнì администрацияöн веськöдлысьöс вежысь. Кызь во уджалìс администрацияын жö главнöй бухгалтерöн Елена Фёдоровна Напалкова, öнì сìйöс вежысь.

Сиктöс сìдзжö дыр нин нимöдìсны да водзö уджалöны культура юкöнын Нина Антоновна Лодыгина да Валерий Александрович Попов, кодъяс ас кадö котыртлìсны велöдчысьяслысь быдöнлы тöдса «Козин» хор. Сиктысь петìсны спортса мастер Дмитрий Доментьевич Громов, мастерö кандидат Николай Степанович Самарин.

Керчомъялöн эмöсь пыдди пуктана гижысьяс: фронт вылын усьлöм Николай Степанович Самарин, ая-пиа Алексей Степанович да Эдуард Алексеевич Тимушевъяс, Виталий Васильевич Уляшев. Бура дыр нин гижö Иван Андреевич Лютоев. Корсюрö мöдöдавлö кывбуръяс казьтылöм нин Н.А.Лодыгина.

Районса газетö сикт йылысь гижлìсны Василий Иванович Уляшев да Юрий Дмитриевич Катаев. Òнì газеткöд ёртасьö Нина Александровна Самарина. Сìйö ыджыд кывкутöмöн уджалö и ветеранъяслöн котыркöд, паськыда туялö чужан муыслысь олöм-вылöм.

Сиктын олöм мунö водзö. Олöны кызвыннас ас овмöс помысь. Сиктлöн пыдди пуктана юралысь Любовь Егоровна Траилина райсöветса депутат Алексей Михайлович Тарабукинлöн отсöгöн вöчö сиктса йöзлы став верманасö. Танì ас кадö вöлì шогмытöм сиктса шöр туй, öнì позьö абутöм дорысь миритчыны. Сиктын арын да тöлын югыд, пуктìсны энергия видзтан 168 лампа. Эм биысь доръян юкöн, кöнì водительöн зэв кывкутöмöн уджалö Владимир Дмитриевич Жикин. Кольöм воын пасйисны челядьлöн нималана «Козин» хорлы 20 да шöр школалы 150 во тырöм. Таво школасö дзоньталасны, сьöм вичмöдас «Монди Сыктывкарса ЛПК» комбинат. Кызвыннас администрация улö дзоньталасны-бурмöдасны культура керкакöд орчча начальнöй школа. Бурмöдасны керкаяскостса туйяс, тырталасны гырысь гуранъяс. Июнь 30 лунö вад дорын котыртласны том йöзлысь унапöлöс ордйысьöм.

 

Комментарии:

Комментарии запрещены.

Свежий выпуск: 28 марта

Осторожно — мошенники!