[ A+ ] /[ A- ]

Вылыс Воч

Воч юлöн шуйга берегын сикт. Чужис 18-öд нэм помын. 1782 вося IV-öд ревизияын пасйöма: «деревня Малая Вочевская» — 7 овмöс, 19 олысь (12 айлов, 7 нывбаба). 1859 воын нимыс вежсьö «Воча верхняя» (Вылыс Воч) вылö, код улын тöдса и талун. Сэки танì вöлì 8 овмöс, 56 олысь (25 айлов да 31 нывбаба). 19 нэмлöн мöд джынйын да 20 нэмлöн пансигöн йöз лыд öдйö содìс. Пример вылö, 1916 воын танì вöлì нин 66 овмöс, 303 морт. Нöшта дас во мысти — 83 овмöс, 395 морт. Но кольöм нэмса сизимдасöд вояссянь йöз лыд кутìс чинны. 1970 воын кö танì олìс 509, то 1989 воын — 305 морт.

Талун Вылыс Вочын 269 морт, 96 овмöс. Видзöны 45 мöскöс, 4 вöлöс. Сиктын кык лавка, начальнöй школа-сад, фельдшерско-акушерскöй пункт, ва мерайтанìн.

Сиктöс ёна нимöдìсны сэтшöм зìль уджалысьяс, кыдзи скöт видзысьяс Клавдия Александровна Гичева да Людмила Андреевна Лютоева, увйысьысьяс Людмила Александровна Логинова да Августа Кирилловна Морохина, пöрöдчысьяс Николай Максимович Гичев да Василий Николаевич Касев, трактористъяс ая-пиа Андрей Егорович да Александр Андреевич Гичевъяс, Андрей Григорьевич Гичев, кузьнеч Анатолий Андреевич Лютоев, велöдысьяс Нина Ивановна Лютоева да Анна Дмитриевна Гичева, киномеханик Василий Григорьевич Лютоев, библиотекаын уджалысь Антонина Алексеевна Чаплыгина, штатнöй вöралысь Виталий Андреевич Лютоев.

Òнì медся пыдди пуктана йöз лыдын ас вылö уджалысьяс Николай Павлович Чаплыгин, Иван Николаевич да Анатолий Анатольевич Лютоевъяс, школа-садса директор Ольга Алексеевна Лютоева, библиотекаса уджалысь Татьяна Ивановна Лютоева.

Торъялö сикт сìйöн, мый öткымынöн дзебöны матыссаясöс öшинь уланыс.

Комментарии:

Комментарии запрещены.

Свежий выпуск: 28 марта

Осторожно — мошенники!