Республикаса юралысьлöн торъя дасьлуна оласног котыртöм йылысь индöдö выльпыртöмöн 65 да ыджыдджык арлыда войтырлы нюжöдöма гортын олан кадсö тавося март 31-öд лунöдз.

Март 12-13-öд лунъясö ГИБДД-лöн районса юкöнысь инспекторъяс уджалiсны Югыдъягын, Кулöмдiнын да Помöсдiнын.
Сувтöдлiсны 63 машина, торкалöмъяс кузя лöсьöдiсны 19 гижöд. Кутiсны руль сайö код юрöн пуксьысь öти водительöс. Унаöн ветлöны тасмаöн пысасьтöг, туй вылын урчитöмторъяс ёна торкалöны и подаяс.

Март 16-öд лунö республикаö, тшöтш и миян районö, локтiсны Санкт-Петербургысь чери кыйöм кузя федерацияса агентстволöн Рытыв-Войвыв управлениеысь государственнöй инспекторъяс.
Тувсовъя чери кыян кад кежлö дасьтысигöн кытшовтöны налöн сойборд улö пырысь кар-районса юкöнъяс. Кулöмдiнын видзöдлiсны уджалан жыр, удж котыртöм, йöзкöд уджалöм, техника да мукöдтор. Йöзкöд сёрниысь тöдмалiсны районын госинспекторлысь уджаланног, кыдзи асьсö кутö йöзкöд аддзысьлiгöн, веськыд-ö, стрöг-ö чери кыйöмын урчитöмторъяс торкалысьяскöд, паныдасьлö-ö вывтiасьöм, кывкутысь-ö уджас да с.в.