Кодкö шуас, мый позьö висьтавны кöза йылысь. А вöлöм позьö. Менам олöмын ёнджыкасö вöлiны сюрукъяс (мöсъяс). Мамлöн ичöтдырсяньыс — кöзаяс. Вöлöма и став посёлоксаясöс повзьöдлiс Борька нима козёл. Со кыдзи казьтывлö сы йылысь мамö: «Кыдзи ме аддзи Борькатö, сылысь öшлысь моз гöрдöдöм синъяссö, юрö пыр жö воисны мамöлöн кывъясыс: » Пышйы!» Ме котöртi потшöсъяс вуджöмöн, сiйö чечалiс потшöс вомöн кыдзи спортсмен. Не кö верстьö мужичöйяс, кодъяс уджалiсны миян керка дорын, ог и тöд, мый мекöд вöлi. Найö ыджыд беддьöн вöтлiсны яндысьтöм синтö. А гортса кöзук вöлi рам. Пенсия вылас нин мам босьтiс кöза, кодлы сетiс мича Роза ним. Но кутшöм тайö вöлi Роза, тöдiс сöмын мам. Кöрталан кö гез вылö, тайö пемöсыс сулалас лунтыр, оз видлы ни öти турун кор. Колян кö домавтöг öтнассö, сэк йöрса капусталы пом. Мамлы шуам: «Мыйла нö тадзи мучитчан, сет кодлыкö!» А сiйö висьталö: «Талöн йöлыс чöскыд, абу дука, кыдз мукöд элясьöны. Юа йöвсö да вынöй кык пöв содö!» Розукыд и тешитчыны радейтiс. Öтчыд петi юкмöс дорö вала. Лэпта черпушка, а кодкö мышкö йöткыштiс мый вынсьыс. Бергöдчи, некод абу. Тадзи кымыныськö. Вöлöмкö, люкыштас, а сэсся пес чипас сайö дзебсьö. Öтчыд мамö лэччöма карö, а ме öтнам локтi гöститны. Пыри да кильчö öдзöссö тасыштi. Пузьöдi самöвар да чай дуньга кампетöн. Кыла, кодкö ветлöдлö посводзöд каблука туфлиöн. Петi посводзö — некод абу. Весиг синва доршасьö, локтi гöститны, а кутшöмкö дивö мекöд. Кутi мöвпавны, пöрысь пöчьяс ёна повзьöдлiсны кастичöмöн да, буди, збыль каститчöмыд эм. Пельöс пуктi öдзöсö да кутi кывзыны. Кодкö каблука ветлö и ставыс. Босьтi пач коколюка да зэв öдйö восьтi öдзöс. А танi Розочка миян. Со кодi вöлöм ветлöдлö. Но, кыдз татчö веськалiс? Медводз кыссьöма кынöм вылас посводз увтi, сэсся кайöма кладовка сувтса поскöд, восьтöма посводз öдзöс да гуляйтö каблука туфлинас. Кор ме пета, дзебсьö кладовкаö. Кöзяйкаыд карö лэччис, а сiйö керка видзö. Бöрд кöть серав сэсся.