Скöрöдумысь Василий Николаевия Шомысов ичöтсянь ёртасьö спорткöд. Торйöн нин сьöлöм сертиыс лыжиöн котралöм. Медводдза воськовъяссö сы вылын вöчис, гашкö, школаö пыртöдз на. Сэсся мöдöд классын велöдчигöн школа бердын буретш восьтiсны лыжиöн котралöм кузя секция, кытчö дыр мöвпавтöг пыр жö и пырис. Челядьыс сэтчö ветлiс уна. Туйдiс-велöдiс Иван Дмитриевич Пашнин. Öти тренировка эз кольлы зонка, шойччан лунъясö весиг ветлывлiс кыкысьöдз на, мый вермис песiс ки-кок, котралiс подöн и лыжиöн, сьöлöмсяньыс вöчис тренерлысь быд индöмтор. Сыысь кындзи быд асыв панлiс зарядкасянь. И сiдз школаын велöдчан вояс чöж. Иван Дмитриевич казялiс сылысь нырччöмсö да кутiс босьтлыны ён спортсменъяскöд öтув ордйысьöмъяс вылö. Медводз районсаяс, сэсся республика тшупöдаяс вылö. Район вöсна петкöдчыны босьтчис сизимöд классын велöдчигöн на, а 9-10-öд классъясын, томъяслöн республикаса öтувъя котырö пырис да, — «Урожай» ДСО вöсна, республика вöсна нин. Тшöкыда петавлiс вермысьяс лыдö.

Кулöмдiнысь Виктория Пименовалы 17 арöc, велöдчö 11-öд классын. Лыжиöн котралö матö сизим во, сытöг овнысö нин оз вермы. Кор мед-воддзаысь нывъёртъясыскöд локтiс спортзалö, сылы танi ёна воис сьö-лöм вылö и кутic ветлöдлыны пыр. Помся нырччöмöн вочасöн сöвмис да кутiс петкöдчыны ордйысьöмъясын, районсаын и весиг республикасаын. Медся казьтыланаöн колис Эжваын мунöм марафон, кодi вöлi 2017-öд воын. Кöть и эз вермы сэнi, но босьтiс сы мында кыпыдлун. Бать-мамыс коркö тшöтш котравлicны лыжиöн и налы зэв нимкодь, мый и нылыс тшöтш пырöдчис тайö спортас. Туйдö-велöдö сiйöс тренер Иван Георгиевич Мишарин, кодi уна во зiлис челядькöд. Зэв тöлка, век отсалö быдторйын, аддзö колана кывъяс, мед кыпöдны лов. Нывлöн мыйкö кö оз артмы, лючки висьталö да велöдö, кыдзи бурджыка вöчны. Виктория cтав сьöлöмсянь пыдди пуктö сiйöс да аттьöалö ставсьыс, мый сы мында во зiльö сыкöд. Лыжиöн котралöм кындзи быд вежон ветлö ворсны спортзалö футболысь, волейболысь да баскетболысь. Оз на стöча тöд, йитас оз ассьыс водзö олöмсö спорткöд. Кöть и тшöкыда мöвпалö та йылысь. Нывлöн эм ГТО-лöн эзысь пас. Сiйö чайтö, мый ёнмöдчыны колö быдöнлы, öд сiйö сетö дзоньвидзалун, мичлун да кыпыд ру. Да и колö мед быдöнлöн вöлi сьöлöм шонтан удж ли мог, медым сы отсöгöн коллявны прöст кад.