Велöдчанiнысь сöмын на петöм том специалистлы, овлö, бöрйöм уджаланiнын сьöкыд пырöдчыны уджö да сэтчöс котырö. Водзын та боксянь вöлi кокниджык, сы вöсна мый уджалан котыръясын томъяслы индылiсны туйдысь-велöдысьясöс. Öнi татшöмыс гежöдтор нин. Но векжö öткымын уджаланiнъясын кутчысьöны на тайö важ пыртöмторйö. Кыдз, шуам, Кулöмдiнса öтиöд номера садйын. Сiйö и гöгöрвоана, öд воспитательяслöн уджыс сьöкыд. Сöмын на диплом босьтысь специалистлы колö пырöдчыны оз сöмын уджö да уджалысьяслöн котырö, но и кужны сибöдчыны челядь дорö, лöсьöдны йитöдъяс бать-мамкöд. Буретш таö воськов бöрся воськов и велöдöны туйдысьяс.Воспитательлöн уджыс уна тшупöда. И том уджалысьлы ставнас öтпырйö шымыртны сiйöс зэв сьöкыд, — висьталiс садса старшöй воспитатель Нина Ивановна Нестерова. — Медводз колö велöдны найöс, медым дасьтiсны асьнысö уджавны челядь дорын, кужисны урчитны водзö вылö могъяс. Колö бöрйыны уджалан туйвизьяс: кыдзи да кутшöм ногöн кутас нуöдны занятиеяс, кутшöм пособиеяс отсöгöн, пыртас-ö ассяньыс мыйкö выльтор, öнi öд выль программа серти эмöсь быд сикас технологияяс — бöрйы кутшöмöс кöсъян. Туйдысь аслас примерöн петкöдлö, кыдзи уджалö челядькöд, сёрнитö накöд, нуöдö занятиеяс, ворсöмъяс, кутшöм йитöд кутö бать-мамкöд да кыдзи уджалö накöд. Сiдзжö велöдö сёрнитны педсöветъяс вылын, петкöдлыны-юксьыны аслас тöдöмлунъясöн, нуöдны восьса занятиеяс. Воспитатель места вылын оз сулав, сылы колö корсьысьны водзö, паськöдны тöдöмлунъяс, лöсьöдны уджалан балаяс, уджö öтарö пыртны мыйкö выльтор. Кад кольöм бöрын том уджалысь вöчö кывкöртöд, кыдзи пырöдчис уджас, ставыс-ö сылöн лючки артмис, мый сетiс сылы туйдысьыс, мыйö велöдiс да с.в.

Бадьёльйылысь Галина Николаевна Чисталёвалы июнь 16-öд лунö тырис 90 арöс. Тшупöда пасöн волiсны чолöмавны да козьналiсны В.В.Путинсянь козин олöмаяслöн районса котырöн веськöдлысь Г.А.Кравченко, райадминистрацияöн веськöдлысьöс вежысь Н.А.Левченко, «Помöсдiн» овмöдчöминса юралысь А.Е.Уляшев. Сиисны ён дзоньвидзалун. 

*Зимстан котыртчис 1931-öд воын, кор татчö вайисны мыжтöг мыждöмаясöс. Соль ю дорын, öнiя посёлоксянь кык километра ылнаын, айловъяс босьтчисны заптыны вöр. Öнi сiйö иныс шусьö Важ Зимстанöн. Важ Зимстан пырис Керчомъяса сиктсöвет улö. 50-öд вояс пансигöн олысьяслöн лыд кутiс ёна содны. 70-90-öд воясö посёлокö овмöдчисны матысса грездъясысь коми йöз. 1976-öд вося декабр 28-öд лунö Зимстан лоис Пруптса сиктсöветлöн шöринöн. 

Скöрöдумысь Николай Степанович Шомысов техникакöд тöдса ёна томсянь, школасянь. Пырис велöдчыны, кыдз и быдöн, сизим арöсöн. Медводдза велöдысьöн вöлi Клавдия Петровна, кодi педучилище помалöм бöрын сöмын локтiс уджавны сиктса школаö. Кыдзи и сiйö кадся мукöд челядь, медводз вöлi октябрёнокöн, сэсся пионерöн. Кöкъямысöд классын велöдчигöн пыртiсны комсомолö. Пыр водзмöстчис школапытшса уджын. 1972-öд воын помалiс Скöрöдумса кöкъямыс класса школа, водзö велöдчис Помöсдiнын. Öти сайын танi босьтiс и трактористлысь право. Школа помалöм бöрын Скöрöдум отделениеса механик Виталий Степанович Пашнинлöн отсöгöн зонмöс босьтiсны татчö уджавны слесарöн. Сёрöнджык сетiсны Т-16-шасси трактор, медым разöдны скöтлы кöрым: турун, силос, комбикорм. Мöскыс сiйö кадöн вöлi уна, та вöсна уджыс тырмис. Сэсся вöзйысис трактор вылö, вичмöдiсны «Беларусь». 

Скöрöдумысь Ольга Валериановна Мингалёва школа помалöм бöрын велöдчис Сыктывкарса видз-му овмöс техникумын зоотехникö. Аслас специальносьт серти уджыс пырöн эз сюр да кутшöмкö кад уджыштiс йöла вöлöга вöчан Помöсдiнса заводын лаборантöн. 1990-öд воын индiсны веськöдлыны Помöсдiнса совхозлöн Скöрöдум отделениеса скöт картаöн.