Кулöмдiнысь Татьяна Романова помалiс 9-öд класс, сылы 16 арöс. Зэв нырччысь, шань сьöлöма нывка. Бура велöдчö. Таво петкöдчис Сыктывкарын «Лидер XXI века» конкурсын, кытчö волiсны республикаса школаясысь да колледжъясысь велöдчысьяс. Ветлiс сэтчö медводдзаысь. Бура петкöдчöмысь, нырччöмысь нывкаöс казялiсны да корисны челядьлöн Россияса öтмунöмлöн чукöртчылöм вылö, кодi лоас сентябрын Усинскын. 

Кулöмдiнын Липинлöн улича бокса ичöтик кушинын синмад ылiсянь шыбитчö кöрта-бетона плитаяс чукöр. Куйлö и куйлö сiйö, и вермö-ö кодкö мöвпыштны, мый тайö коркö вöлi матö нэмсайся шог лоöмторъяс йылысь казьтылан пас. «П» сикас сяма подулыс сулалö зумыда на, а вылысса юкöныс пöрöма, туплясьö бокас. Пемдöма-мисьтöммöма, муртса тыдыштö гöрд рöмöн коркö мавтлöм звездалöн мыгöрыс. Помнита, коркö школаын велöдчигöн на классöн миянöс вайлiсны экскурсияöн тайö памятник дорас. Сэки еджыдöн мавтöм да ляпкыдика потшöм тайö пасыс помтöм-дортöм му шöрын бура тыдалiс ылiсянь. Висьтавлiсны, мый сувтöдлiсны сiйöс гражданскöй война дырйи усьöмъяслы. А кор сiйöс вöчлiсны и мыйла колис дöзьöртöг — öдвакö кодкö вермас висьтавны. Öнi сiйö местасö сьöкыд нин тöдмавнысö, сы вöсна мый танi нюжалiсны выль уличаяс, кыптiсны выль керкаяс. И казьтылан паслöн öнiя серпасыс оз ёна гажöд инсö. 

Керчомъяысь Текуса Ивановна Матвеевалы 90 арöс тырис апрель 4-öд лунö, а паспортас пасйöма июнь 4-öд лун. Ачыс нывбаба чужан лунсö век пасйис май 31-öд лунö, кор Текусаяслöн нимлун. Дзолядырсö казьтылiгöн висьталiс, мый бать-мамыс олiсны зумыда, да найöс кулакалiсны. Мед кыдзкö дорйыны ныв-пинысö, гозъя юксисны. Батьсö мöдöдiсны Сибирö, а мамыс, Агния Егорьевна, челядьыскöд кольччис Керчомъяö. Сибирас батьыс ёртыскöд видлiсны пышйыны, найöс суöдiсны. Ёртсö виисны, а батьсö ранитiсны юрас. Чайтiсны кулöмöн жö да, сэтчö и колисны. Сiйöс аддзис кутшöмкö ныв да сувтöдiс кок йылö. Олöм чöжыс сэсся айловлы ковмис новлыны каска, кодöс вöчисны юрсö бурдöдiгöн. 

Меным да ёртъяслы усис ыджыд шуд ветлыны СанктПетербургö. Нинöм эськö эз артмы Скöрöдумысь Ирина Валентиновна Пашнинатöг, коді и котыртіс ветлöмнымöс. Сійö шуис: вай пö ветламöй Победа лун кежлö Питерö. Миянлы кыкысь корöм оз ков, пыр и кöсйысим: Кырнышаысь ме да Вера Семёновна, Скöрöдумысь Ирина Валентиновна да Светлана Витальевна, Помöсдінысь Екатерина Анатольевна. 

Елена Александровна Кузнецова чужис 1932-öд вося май 1-öд лунö Донын. Чужан сиктын помалiс сизим класс. Уджалiс Кулöмдiнса шырсянiнын кассирöн, сэсся мöдöдiсны Керчомъяö секретаравны судлöн заседаниеясын. Кызь öти во уджалiс Донса сельпоöн юрнуöдысьöн. Петкöдлiс асьсö, кыдзи зэв бур уджалысь, мыйысь сiйöс пыдди пуктöны оз сöмын Донын, Джеджимын да Шöръягын, но и öнöдз на оз вунöдны район пасьта. Ыджыд пай Елена Александровна пуктiс сиктöс сöвмöдöмö. Сылöн юрнуöдöм улын 1980-öд воын Донын кыпöдiсны порсьясöс видзанiн, кöзяйственнöй тöваръяс видзан склад, магазин. Йöзыслöн олöмыс лоис бурджык. Сельполöн уджалан котыр районын век вöлi медбуръяс лыдын. Сиктса йöз унаысь бöрйылiсны водзмöстчысь нывбабаöс сиктсöветса депутатöн. Елена Александровна квайт во вöлi сиктсöветса юралысьöн.