Акань кодь мича тайö челядьыс Улыс Вочса «Оз тусь» садйысьöсь. Колö шуны, мый садйыс кöть районса ылi ичöт сиктысь, а бур уджöн да вермöмъясöн нималö оз сöмын районын, но и республикаын. Сiйö медводдзаяс лыдын пырöдчис «Дзолюк» программаö, кодöс веськöдöма коми кыв, коми оласног да культура пыдiсянь велöдöмлы. И сы серти уджалöны пыр на. Танi эм коми керка-музей, кöнi челядькöд тшöкыда нуöдöны занятиеяс, важногöн вöчлöны рытпукъяс да войпукъяс, пасйöны вичкоса да мукöд тöдчана лунъяс, кыдзи Ыджыд лун, Рöштво, велöдчöны пöжасьны да с.в. Таын, дерт жö, водзмöстчöны садйöн веськöдлысь Н.А.Ветошкиналöн юрнуöдöмöн воспитательяс В.В.Савина, Н.В. да Т.А.Логиноваяс. Налы быдторйын отсасьöны няняяс А.С. да В.Г.Морохинаяс. Тшöтш и бать-мам. Быд гаж кежлö лöсьöдчöны да нуöдöны найöс öтлаын, вöччöдöны-мичмöдöны жыръяс, колiгöн вурöны налы паськöм. Кöть сад абу сэтшöм озыр, а ас вöчöмторъясöн да вурöмторъясöн мукöд садъясысь öдвакö кодкö вермас ордйöдны. Зiльöны, медым гажъясын быд петкöдчигöн зонпосни вöлiны выльысь-выль паськöмаöсь да дзоридз кодь мичаöсь. 

Дiасёръяса школа босьтчисны кыпöдны 1965-öд воын, эштöдiсны 1974-öдын. Нимкодясисны и челядь, и велöдысьяс, и бать-мам. Выль школаö пырисны февральын. Сiйö чайтсис сэтшöм ыджыдöн. Сэнi вöлi спортзал, велöдчыны, ёнмöдчыны, ворсны став коланторйыс. Унатор челядь аддзисны медводдзаысь. Лоис и нуръясянiн. 

Асшöр уджалысь Денис Игоревич Богданов районын медводз босьтчылiс вöчны вöр колясъясысь ломтас. 2010-öд воын сiйö юрсикт бокö восьтiс пилорама. Уджöн могмöдiс юрсиктсаясöс, районсаясöс. Ньöбöм вöрысь вöчис косьтöм пöвъяс, евровагонка да мукöдтор. Пилипызьысь вöчис брикет да иналiс республикаын. Сэки выль ломтасöн вöдитчисны омöля, да кык во мысти эновтчис. Пилипызь мунiс аслас овмöсын кык ломтысянiнö, кысянь шоныд воö пиломатериал косьтанiнö, стружитчанiнö. 

Руч сиктын чоййылын Порошкинъяслöн семьяын быдмис öтка ныв — Танюша. Бать-мамыс, Галина Николаевна да Николай Дмитриевич, ёна лелькуйтiсны сiйöс, гашкö, сы вöсна и быдмис шаньöн, вежавидзысьöн, мичлунсö тöдысьöн, авъяöн. А Ручлöн катыдын быдмис Денис нима зонка. Мамыс, Александра Андреевна, водз колис öтнас да ачыс быдтiс кык пиöс. Школа помалöм бöрын Денис пырис велöдчыны Кебанъёльö трактористö. Татьяна велöдчис пединститутын медводдза во. Кöть быдмисны öти сиктын, а öта-мöдсö «казялiсны» öти рытö. Воисны сьöлöм вылас да кутiсны аддзысьлыны каникулъяс дырйи. Тадзи коли нöшта куим во. Денисöс босьтiсны армияö, а Таня виччысис сiйöс, öд регыд нин колiс вайны кага. Витöд курсын лоис мамöн — чужис енсыкöдкодь Данил пи. Велöдчöм эз эновт, помалiс институт. Денис тшöкыда звöнитлiс, сiйöс виччысисны кык меддона морт. Öти рытö телефонöн сёрнитiгöн висьталiс, мый пукалö нин Москваса вокзалын. Локта пö гортö, регыд аддзысям. Таня топöдлiс ичöт пиуксö. Быттьö мыйкö гöгöрвас дзоля мортыс, висьталiс, мый регыд локтас батьыс. А сэсся кылiс керкаö тотшкöдчöм. Восьтны öдзöс петiс батьыс (олiс бать-мам дорас). Виччысьтöг ныв кылiс дона мортлысь гöлöссö. Денис вöлöма Ручын нин, бöра-водза пыралöма видлыны мамсö да воксö и котöрöн воöма Таня дорö. Сьöрсьыс вайöма Данил пиыслы ыджыд ворсан машина.