Асшöр уджалысь Денис Игоревич Богданов районын медводз босьтчылiс вöчны вöр колясъясысь ломтас. 2010-öд воын сiйö юрсикт бокö восьтiс пилорама. Уджöн могмöдiс юрсиктсаясöс, районсаясöс. Ньöбöм вöрысь вöчис косьтöм пöвъяс, евровагонка да мукöдтор. Пилипызьысь вöчис брикет да иналiс республикаын. Сэки выль ломтасöн вöдитчисны омöля, да кык во мысти эновтчис. Пилипызь мунiс аслас овмöсын кык ломтысянiнö, кысянь шоныд воö пиломатериал косьтанiнö, стружитчанiнö. 

Руч сиктын чоййылын Порошкинъяслöн семьяын быдмис öтка ныв — Танюша. Бать-мамыс, Галина Николаевна да Николай Дмитриевич, ёна лелькуйтiсны сiйöс, гашкö, сы вöсна и быдмис шаньöн, вежавидзысьöн, мичлунсö тöдысьöн, авъяöн. А Ручлöн катыдын быдмис Денис нима зонка. Мамыс, Александра Андреевна, водз колис öтнас да ачыс быдтiс кык пиöс. Школа помалöм бöрын Денис пырис велöдчыны Кебанъёльö трактористö. Татьяна велöдчис пединститутын медводдза во. Кöть быдмисны öти сиктын, а öта-мöдсö «казялiсны» öти рытö. Воисны сьöлöм вылас да кутiсны аддзысьлыны каникулъяс дырйи. Тадзи коли нöшта куим во. Денисöс босьтiсны армияö, а Таня виччысис сiйöс, öд регыд нин колiс вайны кага. Витöд курсын лоис мамöн — чужис енсыкöдкодь Данил пи. Велöдчöм эз эновт, помалiс институт. Денис тшöкыда звöнитлiс, сiйöс виччысисны кык меддона морт. Öти рытö телефонöн сёрнитiгöн висьталiс, мый пукалö нин Москваса вокзалын. Локта пö гортö, регыд аддзысям. Таня топöдлiс ичöт пиуксö. Быттьö мыйкö гöгöрвас дзоля мортыс, висьталiс, мый регыд локтас батьыс. А сэсся кылiс керкаö тотшкöдчöм. Восьтны öдзöс петiс батьыс (олiс бать-мам дорас). Виччысьтöг ныв кылiс дона мортлысь гöлöссö. Денис вöлöма Ручын нин, бöра-водза пыралöма видлыны мамсö да воксö и котöрöн воöма Таня дорö. Сьöрсьыс вайöма Данил пиыслы ыджыд ворсан машина. 

Май öкмысöд лунö Ручса олысьяс кывтыдсянь и катыдсянь восьлалiсны «Кувлытöм полкöн» да вочаасисны казьтылан пас дорын. Кольöм воын серти таво унджыкöн нуисны снимокъяс: пöльяслысь, ыджыд батьяслысь — миянöс дорйысьяслысь фотографияяс. Медся водзын нуисны плакатъяс да флаг. Матö ставныслöн кианыс вöлiны ичöтик флажокъяс. Мунiсны сьылöмöн, юргисны и частушкаяс. Быттьö корöм серти, луныс вöлi шондiа, югыд, мича. 

Май 14-öд лунö районса депутатъяслöн чукöртчылöм вылын ыджыд вермöмöн чолöмалісны Помöсдінса шöр школаысь коми кыв да литература велöдысь Татьяна Владимировна Уляшеваöс.