Вöчисны коми кыв, литература, фольклор, чужан му туялöм кузя республикаса олимпиадалы кывкöртöдъяс. 
Медся уна удж, 48, воис Кулöмдiн районса велöдчысьяссянь. Коми кыв кузя олимпиадаын вермисны Помöсдiнса школаысь Юлия Игнатова да Софья Уляшева, мöдöн лоис Пожöгысь Галина Сенькина, коймöдöн Немдiнысь Кристина Паршукова. Коми литератураысь вермис Пожöгысь Валерия Нелаева, коймöдöн лоисны Керчомъяысь Оксана Кочанова да Скöрöдумысь Виктор Пашнин. Коми фольклор кузя вермис Вочысь Екатерина Лютоева. Мöдöн лоис Ручысь Елизавета Попова, коймöдöн сэтысь жö Валерия Пименова. Вермысьясöс да налысь велöдысьясöс нимöдасны май 17-öд лунö Сыктывкарын.

Май витöд лунö Вылыс Воч дорын Апим грездö сувтöдiсны казьтылан пас, кытчö пасйисны Иван Кириллович да Григорий Андреевич Лютоевъяслысь нимъяссö. Водзмöстчис олöмаяслöн котырöн юрнуöдысь Иван Егорович Гичев. 

«Кувлытöм полклöн» восьлалöмö пырöдчисны Дiасёръяса олысьяс. Май öкмысöд лунö школа дорö чукöртчис сёысь унджык морт, мунiгöн öтувтчисны посёлокса мукöд олысьяс. 

Кулöмдiнысь тылса уджалысь Текуса Васильевна Тимушевалы да война кадö быдмысь Галина Петровна Тянавлы мойвиис ветлыны юркарын мунысь парад вылö. Найöс колльöдi ме. 

Быдсяматорсö мöвпыштö Надежда Михайловна Подюкова, мед ручсаяс оз овны весь. Чукöртлiс ставнымöс сьывны мича коми сьыланкывъяс. Видзöдысьяс сьылiсны тшöтш, ёна кекöначисны. Сьöлöм бурмис, кор исласим лямпа вылын, öд и гажыслöн нимыс вöлi «Лямпа вылын исласям, лым толаын туплясям». Верстьöяскöд тшöтш волiсны дзолюкъяс и олöмаяс. Серамыс тай ылöдз кылiс-а. Нöшта культура керка чукöртлiс видзöдысьясöс «Гажа грездын ваксьыштам» гаж вылö. «Сударушкиö» ветлысьяскöд тшöтш и сиктсаяс пуктiсны ичöтик тешъяс. Йöзлы ёна воис сьöлöм вылö куим Катериналöн — Поповалöн, Булышевалöн да Адамовалöн ворсöмыс. Синванысö чышкалiсны серамысла, кор Владимир Трегубов да Иван Попов аньясö пасьтасьöмöн ворсiсны балалайка вылын да йöктiсны. Тайöс колiс аддзыны! Кор Любовь Попова петiс «Как хотела меня мать…» теш вылö, йöзыс дзик пыр и кутiсны кекöначны, öд сиктсаяс тöдöны сiйöс, кыдз зэв бур артисткаöс. Сыкöд тшöтш ворсiсны А.М.Зезегова, К.Г.Есева, А.И.Адамова, З.М.Гуляева, И.А.Панов, Владимир Трегубов да ме.