Январ 10 лунö пасйис 90 арöс тырöм Смолянкаысь Мария Алексеевна Морозова. Чолöмавны волiсны районса администрацияöн веськöдлысь С.В.Рубан, олöмаяслöн районса котырöн веськöдлысь Г.А.Кравченко, олöмаяслöн Югыдъягса котырöн веськöдлысь В.И.Юшкова, сиктса овмöдчöминлöн администрацияöн веськöдлысь В.В.Паршуков. Сиисны ён дзоньвидзалун да кузь нэм, сетiсны президент В.В.Путинсянь козин. 

Висьталiсны, мый миян районын эм гуслиöн ворсысь Александр Иванович Шахов (снимок вылын) да окота лоис тöдмасьны сыкöд. Чужис Вöльдiнын, а быдмис Ягкöджын. Бать-мамыс вöлiны вöрдорса удж бергöдысьясöн. Быдмис медся ичöтöн, кык чойыс öнi Затонынöсь. 

Терапевту из поселка Югыдъяг требуется помощь на дорогостоящие лечение и консультации. 

Ми, Кулöмдiнса спорт школалöн быдтасъяс, выль во бöрын регыд и сувтiм лыжи вылö, январ коймöд лунö котралiм 500, 1000 да 1500 метра. Медся ичöт вермасьысьлы вöлi 14, медся ыджыдлы — 60 арöс. Вермисны Иван Мишарин да Ольга Лодыгина, мöдöн лоисны Михаил Копылов да Алиса Сергеева, коймöдöн — Фёдор Нестеров да Екатерина Мишарина. Вермысьяслы вичмисны козинъяс. Сэсся юим чай. 

Декабр помын чукöртчылiсны овмöдчöминъясса юралысьяс. Сёрнитанторъяс лыдын вöлi и лöп-ёг да гортса овмöсъясысь колясъяс петкöдöм. 
Казьтыштам, мый кольöм вося ноябрсянь та вöсна кывкутö «Ухтажилфонд» котыр. Миян районын сiйöс петкöдлысьöн лоö В.Д.Напалков. Сiйö дженьыдика висьтыштiс, кыдзи котыртöма удж, кутшöм мытшöдъяскöд паныдасисны да кыдзи кутасны разьны гöрöдъяс. Сiдз, лунöн шöркодя чукöрмö 150 гöгöр кубометр шыблас. Ноябрын районысь лöп-ёг чукöртанiнö нуисны 3900 кубометр. «Ухтажилфондлы» пöдрадöн уджалö «Север» котыр, но техникаыс абу тырмымöн. Кöнсюрö оз тырмыны контейнеръяс. Öткымын овмöдчöминын овмöсъясысь чукöртöм лöп-ёг чукöртанiнö вöр пилитысь котыръяс кисьталöны пилипызь. Татшöм сора шыбласъяссö «Ухтажилфонд» оз босьт. Уна элясьöм воö йöзсянь, кодъяслы вайисны лöп-ёг петкöдöмысь вештысьöм кузя квитанцияяс. Кодлыкö арталöмаöсь унджык олысь лыд серти (шуам, меным аслым воис вештысьны вит мортысь, кöть эськö семьяын нёльöнöсь), кодлыкö квитанция эз во. Деревнясаяслы арталöмаöсь, быттьö найö ломтöны оз пач, а керкааныс воö шоныд. Эмöсь овмöсъяс, кöнi, керкааныс кындзи, торъя би счётчик сулалö гидын ли гожся пусянiнын — быд торъя стрöйба вылö воöма торъя кабала. Югыдъягысь öткымын помка вöсна ноябрын лöп-ёг эз чукöртны ни эз петкöдны. Олысьяслы та йылысь юöртiсны водзвыв да висьталiсны, мый вештысьны сiйö тöлыссьыс оз кутны, но квитанцияяс воисны быд керкаö. Артмö, мый котыр уджö босьтчис йöзöс ылöдлöмсянь. Кутшöмсюрö сиктъясын (сiйö жö Помöсдiнын да Кулöмдiнын) эмöсь керкаяс, кытчö воö шоныд, сэкжö найö и пачаöсь, кодöс ломтöны матö быд лун. Налы, закон серти, ковмас вештысьны кыдзи бур патераысь. Унаöн оз вештысьны сы вöсна, мый абу лöп-ёг петкöдöм кузя «Ухтажилфондкöд» сёрнитчöм. Законын урчитöма, мый котыр вермас уджавны сiдз шусяна публичнöй договор серти, кор сiйö вöчö урчитöм удж, кодi инмö дзик быдöнлы, да таысь корö вештысьны. Сёрнитчöм кырымавны абу быть, а вештысьны — быдöнлöн мог. Морт кö кöсйö кырымавны «Ухтажилфондкöд» сёрнитчöм, сылы колö аслыс шыöдчыны котырö.