Локтан 2019-öд во лоö Кольквиж Му Порсьлöн воöн. Эскöны, мый сiйö ваяс сöмын бур. Пемöссö лыддьöны шаньöн, сiйö оз радейт зыксьöм. Лöнь кад лöсялас налы, кодъяс кöсйöны гозйöдчыны, öд Порсь зэв вылö донъялö семьякостса шуд. Öткаяс аддзасны пöвнысö, а кагатöмъяслöн вермасны чужны челядь. Порсь татшöмтортö радейтö, сiйö ачыс вермас чужтыны öтпырйö дасöс.

Виктор Петрович ИГНАТОВ — «Кулöмдiн» овмöдчöминса администрацияöн веськöдлысь:

• Воыс юрсиктлы вöлi зэв тöдчанаöн. Августын воссис лыжероллерöн котраланiн, декабрын лыжи сеталанiн. В.С.Лодыгин нима улича вылын вöчисны туй. Ленинлöн улича вылын нюжöдiсны канализация визь да уна патераа öкмыс керкаысь олысьяс йитчисны нин сэтчö, мукöд керкаяс йитчасны локтан воын. Эштöдiсны шöр школалысь кыпöдöм торъя юкöн, кытчö ичöт класса велöдчысьяс пырасны локтан велöдчан воын.

Бöръя воясö миян Немдiн сикт да сійöс нимöдысьяс йылысь петіс некымын книга. 2015-öд воын — «Герой Советского Союза Георгий Тимушев» да «Усть-Немская школа сквозь годы (1860-2015)». 
Георгий Фёдорович чужан сиктсö нимöдіс Великöй Отечественнöй война вылын Рöдинаöс дорйигöн Сöветскöй Союза Геройлысь ним шедöдöмöн. Книгасö лöсьöдісны районысь журналист Николай Александрович Лютоев да велöдысь Нина Алексеевна Нефёдова. Налы отсасисны Немдінса да Кулöмдінса библиотекаясын уджалысьяс. 

Вермас сiсьмыны
Ноябрын «Юрган» телеканалын юалöмъяс вылö вочавидзис Стройжилтехнадзорса службаöн веськöдлысь Р.А.Шашев. Сы дорö шыöдчылiс Тимшерысь Е.С.Фаныгина. Ань олö нёль патераа керкаын, öти на пиысь во кызь нин куш. Патералöн кöзяйкаыс пропишитчöма, но олö мöдлаын да локны оз кöсйы. Ломтытöг оланiныс кутiс тшыкны, сэтчö жö виялö вевтыс да вермас вальдыны йиркыс, мый тшыкöдас дзоньнас керкасö. Шыöдчылiсны овмöдчöминса администрацияö, но сiйö нинöм вöчны оз вермы. Овтöминысь ань выпишитчыны оз кöсйы. Татшöм керкаыс овмöдчöминын бура уна. Мый позяс вöчны?