Кулöмдiн районса суд приставъяслöн юкöнысь юрнуöдысь специалист эксперт-туясьысь Михаил Иванович Попов лоис республикаын 30 туясьысьысь медся бурöн. Конкурслöн медводдза тшупöдын донъялiсны удж кузя тöдöмлунъяс, медводдза во джынйöн вöчöм удж. Петкöдчис и Карелияын, кöнi лоис квайтöдöн. Судлöн кывкöртöдъяс серти панö уголовнöй делöяс ыджыд кредитъяс да алиментъяс вештытöмъяс, судын лöньлун торкалысьяс либö судьяöс да судö локтысьясöс лёкöдысьяс да мисьтöм кывъясöн сёрнитысьяс, арест улö веськалöм эмбур вузалысьяс либö кодлыкö козьналысьяс, судлысь кывкöртöдъяс олöмö пöрттöмъяс вылö, корсьысьö найöс. — Таво панi 39 уголовнöй делö. Öтиöс медшöр бухгалтер вылö, кодi судлöн кывкöртöд серти мортыслöн удждонысь эз бергöд уджйöз. Судын лöньлун вöсна кывкутысьяс кö гижöны рапорт, мый кодкö шуасис лёк кывъясöн, туяся, шыöдча Сыктывкарса госуниверситетö кыв боксянь донъялысьяс дорö. Став панöм уголовнöй делö кузя лöсьöда гижöд да ыста судö — сёрнитiс медводдза класса юрист Михаил Иванович, кодi водзтi 15 во да джын уджалiс туясьысьяслöн пытшкöсса делöяс кузя министерстволöн районса юкöнын да шедöдлiс республикаын медбур туясьысьлысь ним. Талун суд приставъяслöн юкöнöн веськöдлысь О.Г.Гуляев Михаил Ивановичлы суд приставъяслöн федерация службаса директор — Россияса медшöр суд пристав Д.В.Аристов нимсянь вичмöдiс диплом, «2018-öд вося медбур туясьысь» пас да аттьöалан гижöд. Пасъям, суд приставъяслöн районса юкöн пыр медбуръяс лыдын. Гижöд да снимок Марина Дадашовалöн.
Читать далее →

Октябр 3-öд лунö «Юрган» телеканалын республикаса олысьяслöн юалöмъяс вылö вочавидзис стрöитчан да туй овмöс министр Андрей Александрович Крикуненко. 
Районса олысьяс юасисны туйяс да посъяс дзоньталöм йылысь. 
— Кор Югыдъягын дзоньталасны Комсомольскöй да Сöветскöй уличаяс? 
— Дасьтöма Комсомольскöй улича вужвыйöн дзоньталöм кузя документъяс. Öнi сiйöс видлалö государственнöй экспертиза. Водзö видзöдласны, эм-ö позянлун сюйны тайö уджъяссö локтан вояс вылö урчитöм уджъясö. 
2019-öд воын арталöны картаясöн дзоньтавны Югыдъягысь Сöветскöй улича. 
Дзоньтавтöдз тайö уличаяс вылö сьöм вичмас сiйö сьöмысь, кодöс урчитöма видзны Кулöмдiн районын туйяс кутöм вылö. 
— Немдiн дорын кутасны дзоньтавны понтон пос. Позяс-ö дзоньтасигас мунны сы кузя транспортлы? 
— Пос кутасны дзоньтавны 30-40 лун, сэк, кор арнас тулö ваыс. Колö шуны, мый тайö кадö понтон тупкылöны быд во. 
Дзоньтасигöн, ваыс кö оз вывтi ёна ту, пос кузя позяс ветлыны подöн. А машинаяслы туйыс лоас сиптöса.
Читать далее →

Октябр 10-öд лунö «Юрган» телеканалын республикаса олысьяслöн юалöмъяс вылö вочавидзис дзоньвидзалун министр Дмитрий Борисович Березин. 
Дзоньвидзалун министерство аслас сайт вылын йöзöдiс юалöмъяс вылö тыр вочакывъяс. Шыöдчылiсны и Кулöмдiн районса олысьяс. Со мый найö юасисны да мый вочавидзис министр. 
— Кор Кужйын кыпöдасны выль фельдшерско-акушерскöй пункт? Миянлы кöсйысьöны куим во нин. Сы улö торйöдöма му юкöн. Дыр-ö ковмас виччысьны? 
— Кулöмдiн районын колö кыпöдны 19 ФАП, на лыдын и Кужйын. Ставыс сьöм сайын, уна-ö сiйö лоас локтан воясын. 
— «Пожöг» овмöдчöминын олö 1856 морт, на пиысь 994-öн уджалöны, пенсия арлыдаöсь 397-öн, та мында жö челядь. Öтувъя практикаа врачлöн амбулаторияö волывлöны овмöдчöмин улö пырысь сизим сикт-грездысь, кодъяс Пожöгсянь 2-10 километра ылнаынöсь, олысьяс. Юрсиктöдз Пожöгсянь 60 километра. Тулыснас да арнас, йи сувттöдз, тайö вож кольö дi вылö. Тайö кадö сиктсаяс кутöны лача сöмын ас бурдöдысьяс вылö. 
Сиктса йöз сэтшöмöсь, мый бурдöдысь дорö шыöдчöны сёр арын да тöлын, кор этшаджык гортгöгöрса удж. Асланыс дзоньвидзалун бöрся видзöдöны кийывсöн, зэв неокотапырысь кольöны гортса овмöс. Та вöсна паськалöны дыр кыссьысь хроническöй висьöмъяс. Государство босьтiс дöзьöр улö йöзлысь дзоньвидзалун бурмöдöм, и мед эськö тайö могсö бурдöдысьяс вöчисны эз ас тшöт весьтö. 
Бурдöдан юкöн кузя кыпöдлiсны сёрни «Пожöг» овмöдчöминса депутатъяс. Найö корöны Пожöгса бурдöданiнлы тэрыб отсöг сетан выль машина. Воддзаыс 2008-öд вося, уджалан кадыс помасьлiс нин. Тайö юалöмöн шыöдчылiсны уналаö, но некодарö нинöм оз вöрзьы. 
— Кулöмдiнса шöр бурдöдчанiн шуис кад кежлö сетлыны Пожöгö öти тэрыб отсöг сетан машина. Дзоньвидзалун министерство 2018 воын ньöбас вит санитарнöй машина, на пиысь öти вичмас Пожöгса амбулаториялы. 
— Öти медсестра ставка джын вылö вöчалö уколъяс лунся стационарын куйлысьяслы, мöд ставка джын вылö — амбулаторнöй висьысьяслы, кодъяс бурдöдчöны гортаныс да больничаö волöны уколъяс ли капельницаяс вылö. Тайö ставка джынсö выль восянь кöсйöны чинтыны. Вöчасны кö тадзи, медсестралöн амбулаторнöя висьысьяс вылö кадыс оз кут тырмыны. 
— Пожöгса амбулатория пырö Кулöмдiнса шöр бурдöдчанiн улö. Сiйö сетö медицина отсöг Пожöгса, Пожöгдiнса, Кекурса да Великопольеса 1048 олысьлы. Россия Федерацияса дзоньвидзалун министерстволöн 543н номера индöдлöн 13-öд номера содтöдын пасйöма, мый процедурнöй медсестралöн öти ставка урчитöма 3000 верстьö морт да челядь вылö. Сы вöсна мый овмöдчöминын олысьяслöн лыдыс тöдчымöн этшаджык, ставка джын чинтöм некодар боксянь оз лёкмöд медицина отсöг сетöм. 
— Зимстанса олысьяслöн чукöртчылöм вылын вöлi эскöдöма, мый сэтчöс бурдöданiнын уджалысьяслысь ставкаяс оз чинтыны. А талун налöн ки выланыс öлöдан бумагаяс. 
— Штатъяс чинтiгöн быть кутам тöд вылын, мед тайö эз тöдчы лёк боксянь йöзлы медицина отсöг сетöм вылö. Декабр 1 лун кежлö урчитöма кольны акушеркалысь ставка джын (таво öкмыс тöлысьöн сiйö примитiс 1272 мортöс, шöркодя луннас дасöс, мый лöсялö буретш ставка джынлы). Физиотерапия кабинетысь медсестралы коляс ставкалöн нёльöд пай (видзöдöма тавося удж серти). Процедурнöй кабинетса медсестралöн лоас ставка джын. Танi колö кутны тöдвылын, мый Кулöмдiнса шöр поликлиникаын процедурнöй кабинетысь медсестра луннас примитö йöзöс некымын пöв унджык, а удждонныс öткодь. Физиокабинетысь санитарка-мыськасьысьлысь должносьт вежасны пелькöдчысь вылö, ставка джын вежсяс 0,25 ставка вылö. 
— Тимшерса бурдöдчанiнлы колö тэрыб отсöг сетан машина. Тайö юалöмöн унаысь шыöдчылiм министерствоö, вочакыв абу. 
— Талун Тимшерса бурдöдчанiнлöн эм 2000-öд воын лэдзöм «УАЗ-3962» машина. Сiйö абу жугалöма, уджалö, та вöсна выль машина оз ло. 
— Тимшерса бурдöдчанiнын кöсйöны чинтавны штатъяс. Мыйкöд тайö йитчöма? 
— Октябр 1-öд лун кежлö тiян бурдöдчанiнын эм лунся стационарын процедурнöй медсестралöн, поликлиникаын акушеркалöн да физиотерапия кузя медсестралöн тыр ставкаяс. Россия Федерацияса дзоньвидзалун министерствоöн урчитöма, мый овмöдчöминын олысьяслысь лыд тöд вылö босьтöмöн, Тимшерса бурдöдчанiнын колö процедурнöй медсестралöн ставка джын, физиотерапияын 0,25 ставка. Штатын акушерка абу, сiйöс пыртiсны вежöмöн. Кулöмдiнса шöр бурдöдчанiн сьöм видзтöм да штатъяс урчитöм мындаö вайöдöм могысь куимнан медсестралысь кольö ставка джынйöн (йöзöс оз чинтыны). Сэкжö шöр бурдöдчанiнöн веськöдлысь ас вылас босьтö тырвыйö кывкутöм, уна-ö мортöс кольны. 
Читать далее →