Читать далее →

Октябр 31-öд лунö республикаса юралысьлöн районса примитанiнын юалöмъяс вылö вочавидзис районын Россияысь пытшкöсса делöяс кузя министерстволöн районса юкöнöн веськöдлысь Андрей Михайлович Литвинов. 
— Шыöдчи юрсиктса öти котыр дорö, медым вежисны куим öшинь да öдзöс. Öшиньяс пуктiсны бура, öдзöссö лёка. Звöнита, но оз шыасьны. Пыралi на дорö Кулöмдiнö волiгöн, кöсйисны лöсьöдны, но öнöдз лöнь. Мый вöчны? 
— Кийывсöн уджалысьяс кузя колö шыöдчыны мирöвöй судö. Ми вермам отсавны гижны шыöдчöм. 
— Миян посёлокын гортсяньыс вузасьöны спирт сораса юанторъясöн дасöн. Мый вöчö та кузя тiян юкöн? 
— Кык тöлысь сайын нин шыöдчи полицияö, мед кыскасны кывкутöмö спирт сораса юанторъясöн кык вузасьысьöс, но вочакыв эз и во. 
— Миян уджалысьяс дасьтiсны административнöй гижöдъяс да шыöдчим судö. Октябрын районысь гортсянь куим вузасьысьöс кыскисны административнöй кывкутöмö. Та кузя уджалам ёна, волам и тiян сикт-посёлокö. Ми тöдам, кодъяс вузасьöны, но сьöкыд корсьны мортöс, кодi эськö висьтасис, мый сiйö ньöбис курыдторсö сiйö либö мöд вузасьысьлысь. 
— Зимстан вожын уджалö участокса выль уполномоченнöй, могмöдö и «Дзоль» да «Улыс Воч» овмöдчöминъясöс. Сылы эз сетны оланiн да быд лун лоö ветлыны Паспомсянь. Кодi кывкутö уполномоченнöйöс оланiнöн могмöдöм вöсна? 
— Кывкутö овмöдчöминса администрация. Кодаркö боксянь, гашкö, быд лун ветлöмыс и бур. Сылöн зэв ыджыд юкöн да став шыöдчöм да лоöмтор кузя дасьтöм гижöдъяс колö вайны Кулöмдiнö, гортас локтiгöн и вöчас тайöс. 
— Быд лун юрсиктын сикт-посёлокъясысь воöм автобусъяс дорын сулалöны йöзöс таксиöн гусьöн новлöдлысьяс. Водительяс шуöны, мый вайисны рöдвужсö. Оз вермы лоны, мед быд лун öти кадö локтiсны рöдвужыскöд. 
— Гусьöн новлöдлысьöс эрдöдöм могысь колö, мед йöз висьтасисны, мый локтiсны «гуся» таксиöн, а найö оз висьтасьны. 
— Донын гусявлöны машинаясысь бензин. Танi участокса уполномоченнöй абу да мед кöть волывлiсны тiян уджалысьяс. 
— Быд лоöмтор кузя пыр жö колö юöртны полициялöн дежуритан юкöнö. Туйö пыр жö петасны туясьысьяс-корсьысьысьяс. 
— Тырмöны-ö участокъясса уполномоченнöйяс да кыдзи налы юклöны сикт-грездъяс? 
— Талун колö участокса вит уполномоченнöй. Кулöмдiнын кык пыдди уджалö öти. Югыдъягын В.Д.Генке сизим во сайын петiс шойччыны да сэксянь сэнi пыр кадся уполномоченнöй эз на вöв. Кöнi найö абуöсь, ыстывлам мукöд участокъясысь. Öнi дасьтам мортöс, кодi лоас участокса уполномоченнöйöн Помöсдiн вожын. Участокса öти уполномоченнöй шöркодя видзöдö 2500-3000 морт бöрся. 
— Кымын морт талун велöдчö пытшкöсса делöяс кузя министерстволöн вузъясын? 
— Велöдчöны нёльöн, кыкыс пырисны таво. Уджалысьяс оз тырмыны. Полицияын эмöсь юкöнъяс, кöнi тырмымöн армияын служитöм. Ышöдам школаясын велöдчысьясöс, медым бöръясны миянлысь вузъяс. Ёртасям райвоенкоматкöд, мед локтiсны уджавны юкöнö армияысь воысьяс. 
— Шыöдча Кулöмдiнса шöр школаын велöдчысьяслöн бать-мам нимсянь. Сёрнитлiм нин, мед патрульно-постовöй службаса уджалысьяс сикт кузя ветлiгöн пыравлiсны и школаö, кытшовтiсны гöгöрыс, кöнi куритчöны дзебсьöмöн. Найö волывлiсны, но бöръя кадас дугдiсны. 
— Сёрнисö кыпöдла удж вылын чукöртчылiгöн. Но пасъя, мый школаын колö уджавны и тыр арлыдтöмъяслöн делöяс кузя инспекторлы. 
— Позьö-ö отсасьны народнöй дружинникъяслы да ас окотаöн волысьяслы? 
— Талун дружинникъяслöн котыръяс эмöсь Кулöмдiнын да Кебанъёльын. Накöд йитöда миян торъя уджалысь. Тiянлысь вöзйöм босьта тöд вылö да видлалам чукöртчылiгöн. 
Марина Дадашова. 
Гижысьлöн снимок вылын: А.М.Литвинов.
Читать далее →

Декабр 8-öд лунö тырас 25 во, кыдзи Дмитрий Владимирович Ших уджалö пытшкöсса делöяс кузя министерстволöн районса юкöнын. Тавося июньсянь сiйö полицияса начальник. 
Коми пединститут помалöм бöрын милицияö пырны ышöдiс Дмитрий Александрович Юшков ёртыс, кодi сэки тöдмасис ОБЭП юкöнлöн уджöн. Сiйö юкöнас жö и вöзйисны уджавны Дмитрий Владимировичлы. Во мысти вуджис уголовнöй розыскö. Оперуполномоченнöйсянь быдмис юкöнса начальникöдз. 
— Уголовнöй розыскын меным сетiсны Югыдъяг вож. Туясим-корсьысим 3-5 лунöдз. Машина эз вöв, кытчöкö воöдчылiм йöз машинаöн, кытчöкö самолётöн, Дзолльö да Габовö и вöлöн. Сэки матö быд сикт-посёлокын вöлiны туй морт керкаяс да узьлiм сэнi. Сотöвöй телефонъяс эз вöвны, колiгöн звöнитлiм сиктса администрациясянь, лэдзлiсны гортаныс и йöз. 2015-öд воын полиция пырис выль керкаö. Быдöнлöн лоис торъя жыр, компьютер да сы дорö коланторъяс, телефон. Участокъясса уполномоченнöйяслöн, юкöнъясса начальникъяслöн, старшöй уполномоченнöйяслöн да ОБЭП юкöнса уджалысьяслöн эмöсь сим-картаа служебнöй телефонъяс. Чолöмала öнiя да воддза уджалысьясöс асланым лунöн, сиа дзоньвидзалун, семьяясын шаня олöм. Торйöн аттьöала уджалысьяслысь гöтыръяссö, кодъяслöн пельпомъяс вылын став гортса удж да челядь. Найö гöгöрвоöны верöсъяснысö, кодъяс сизим час асывсянь удж вылынöсь, гортö бергöдчöны сёрöн. Сиа быдмыны удж кузя, шедöдны вермöмъяс, — сёрнитiс Д.В.Ших, кодлысь бур уджсö пасйисны «Криминальнöй милицияса медбур уджалысь» пасöн, пытшкöсса делöяс кузя Россияса министерстволöн пыдди пуктан грамотаясöн. 
Гижöд да снимок 
Марина Дадашовалöн.
Читать далее →

Дзольса администрацияöс, кöнi уджалöны нёльöн, кöсйöны öтувтны Зимстансакöд. 
Сы вöсна мый танi йöз лыд и скöт öтарö чинö, му-видз вöрсялö, кöлысьяс оз юргыны. Сiдз, пенсия вылö петöмкöд йитöдын во помын кöсйö дугдыны фермералöмысь Валентина Вениаминовна Логинова, кодлöн талун кежлö колис

Читать далее →