Октябр 18-öд лунö республикаса юралысьлöн районын общественнöй примитанiнын йöзлöн туйяс кузя юалöмъяс вылö вочавидзис районса администрацияöн веськöдлысьöс вежысь В.В.Бадьин. 
— Локтан воын Донлöн тшöпöда пас, сиктлöн артмöмсянь тырас 300 во. Бур лоас, сы кежлö кö дзоньталасны юрбитанiнсянь сикт помöдз шогмытöм нин асфальта туй. 
— Донын туй республикалöн. Сiйö сетö тöдчанлун сэтшöм туйяслы, кытi ветлö уна машина. Тiян корöмöн шыöдча автомобиля туйяслöн управлениеö. 
— Аттьö, мый дзоньталiнныд Пожöг дорын Эжва вомöн понтон. Но колö дзоньтавны Сыктывкар-Мылдiн туйсянь 12 километр пыран да Пожöг сайысь шойнадорса туй юкöнъяс. Пожöгö автобусöн быд лун нуöны-вайöны Пожöгдiнса, Великопольеса да Ярашъюса велöдчысьясöс, тайö туйöд жö быд лун ветлö йöз тыра автобус. 
— Локтан во кежлö автомобиля туйяслöн управление урчитiс вужвыйöн дзоньтавны воддза воясын вужвыйöн дзоньталöм туй юкöнсянь Пожöгö пыранiнöдз юкöн. Сувтас 400 гöгöр миллион шайт. Вöчасны кык-куим воöн. Пыранiнсö вужвыйöн оз дзоньтавны, но ми тшöктам, мед тыртасны гуранъяссö. Шойнадорса туй кузя шыöдча Пожöгса юралысь дорö. 
— Куим во сайын юрсиктын вöвлöм «Мебельнöй» магазин дорын кодйылiсны туй пöлöн гуран. Колö кодйыны водзö Вичко шорöдз, мед ваыс эз мун Интернациональнöй улича вылö. Тулысын ва шорöн лэччö Стрöительяслöн уличасянь, водзö визувтiгöн туйсö вожöдiс нин öти метра пыднаöдз. 
— Колö волöмöн видзöдлыны, мед тöдны, мый вöчны. 
— Мирöвöй судлöн керкасянь зэв сьöкыд петны гаражъяс дортi шöр туй вылö. Лöсьöдасны-ö тайö туй юкöнсö? 
— Кор кыпöдiсны керкасö, ми видлалiм, кытi вöчны туй. Гаражъяс дортi, туй пöлöн кодйöмöн да туй вылö из сора лыа вольсалöмöн, либö школа-интернат дортi. Овмöдчöминса администрация вöзйис бöръясö. Сэтi тöвнас бурджык весавны лымйысь, сiйö пыранiныс лöсялö ветлыны кусöдчысьяслöн машинаяслы. Сiйö керка сайын кольöм му юкöнъяс вылö урчитiм кыпöдны шогмытöм оланiнъясысь вуджысьяслы керкаяс, но программаыс районын оз на уджав. Пырöдчам кö тайö уджтасö, кутам сёрнитны и туйяс кузя. 
— Дереваннöй сиктын бурдöдчанiн да «Барс» котырлöн лавка костын ыджыд, пидзöсöдз няйт гöп. Йöз öдва воöдчöны коланаинъясö. Куим во нин сьöлöм дойöн шыöдчам сиктса юралысь дорö, но серпас оз вежсьы. Колö вайны из сора лыа да лöсьöдны шогмытöминъяссö. 
— Волам да видзöдлам, мый позяс вöчны. 
— Автобусын воддза пуклöсъясыс олöма йöзлы, кагаа мамъяслы, вермытöмъяслы. Тшöкыда овлö, кор йöзыс уна, найö мунöны сувтсöн. Позьö-ö тайö майшöдланторсö видлавны йöзöс новлöдлысь асшöр уджалысьяскöд чукöртчылiгöн, мед водительяс сёрнитiсны автобусын мунысьяскöд, мед сетасны пуксьыны лыддьöдлöм йöзыслы. 
— Йöзöс новлöдлысь асшöр уджалысьяскöд чукöртчылам вонас нёльысь. Тiянлысь вöзйöмтö босьта тöд вылö да сы йылысь сёрнитам локтан чукöртчылiгöн. 
Уна юалöм вöлi Кулöмдiн-Носим-Паспом туй кост кузя. 
— Тайö шогмытöм туй юкöн кузя школаса автобус ветлö луннас кöкъямысысь. Öти автобус жугалiс, запчасьтыс абу да сулалö гаражын. 
— 2010-öд восянь тайö туй кузя ветла удж вылö, но татшöм лёк серпассö эг на тöдлы. 
— Грейдерöн зыртiсны став из сора лыасö да туй вылын артмисны ыджыд гöпъяс. 
— Кодi кывкутö тайö туй кузя велöдчысьясöс автобусöн тыр-бура нуöм-вайöмысь? 
— Лёк туй вöсна Паспомö дугдiсны ваявны Озъягысь чöскыд нянь. 
— Гöгöрвоана, кузя зэрöмöн грейдерöн он лöсьöд-шыльöд туй, лоас весьшöрö, но колö мыйкö вöчны, мед эз ков майшасьны быд тулыс-ар. 
— Паспом-Носим костын зэв ыджыд ва гуран. Кодi оз тöд тайö юкöнсö, вермас веськавны неминучаö. 
— Тайö туйыс республикалöн, 2014-öд восянь кутö «НефтеГазЭнергоСтрой» котыр. Кор «Мондилы» пöдрадöн уджалысь «Технолес» пöрöдiс да петкöдiс вöр, туйяс вылö видзисны контракт серти урчитöмысь унджык сьöм. «Технолес» дугдiс уджавны да «НефтеГазЭнергоСтрой», локтан во босьтöмöн, уджсö вöчö контракт серти тöлысьнас нёльысь, вежоннас öтчыд. Районса администрация шыöдчис нин Коми республикаса стрöитчан, тарифъяс, жилищно-коммунальнöй да туй овмöс министерствоö, мед районын вöчисны-дзоньталiсны став му туйсö да мед найö лöсялiсны урчитöмторъяслы. Öнi колис виччысьны кынмалöм, грейдерлы сэки бурджык шыльöны-лöсьöдны туй юкöнъяс. 
В.В.Бадьин пыр жö телефон пыр йитчылiс «НефтеГазЭнергоСтрой» котырса мастеркöд. Сiйö вочавидзис, мый октябрын куимысь пыдди грейдер петавлiс витысь нин, а Носим-Паспом костын ыджыд гурансö тыртлiсны куимысь нин. 
Веськыд йитöд дырйи Кулöмдiнысь аэропортса олысьяс корисны, мед сиктлöн тайö юкöнö асыв да рыт ветлiс автобус. Кöть туйяс сиптiсны, мед эз ветлыны ыджыд машинаяс, вывтiасьöны ас районса асшöр уджалысьяс. Та йылысь юöртiсны тимшерсаяс да ыстiсны весиг снимайтöмсö. В.В.Бадьин став юалöмсö, элясьöмсö, вöзйöмсö босьтiс тöд вылö, мед уджавны на вылын, корсьны петан туйяс. 
Марина Дадашова.
Читать далее →

Кулöмдiнысь Александр Анатольевич Логиновлöн да Кристина Юрьевна Апостолидилöн семьяын велöдчан во пансис эз сöмын быдтасъясыслы, но и семья кутысьлы. Александр Анатольевичöс мöдöд во бöрйисны бать-мамлöн школаса котырöн юрнуöдысьöн. Еремей пиыс кöкъямысöд классын, и батьыс медводдза классянь вöлi бать-мамлöн класса котырын. Сiдзкö, кöкъямыс во нин олö школалöн тöжд-могъясöн. 
— Бать — сiйö семьялöн юрыс, кывкутысьыс. Ёна водзтi ставыс вöлi айлов сайын, гöтыръясыс сöмын отсасьлiсны. Олöмыс вежсис да батьяс вешйисны челядьöс быдтöм-велöдöмысь, ставсö сетiсны гöтыръяслы. Мыйкö кö лоас, мыждам аньясöс — «тэ тадзи быдтiн», кöть эськö асьным ёнджыка мыжаöсь, мый öтдортчим. Но, видзöдан да, бöръя кадас векжö батьяс бергöдчисны семьялань, асывнас вайöны быдтасъяснысö садйö, колльöдöны школаö, волывлöны бать-мамъяслöн чукöртчылöмъяс вылö, петкöдчöны челядьыскöд ордйысьöмъясын да с.в. Эмöсь бурланьö воськовъяс, — висьталiс Александр Анатольевич. 
Талун бать-мамлöн школаса котырын 44 морт, налöн веськöдлан котырын квайтöн. Öтув чукöртчылöны вонас нёльысь, а веськöдлан котыр быд тöлысь. Топыд йитöда школаса администрациякöд, сёрнитöны велöдöм да эмбур-сьöмöн олöм-бергöдчöм ёнмöдöм кузя. 
Таво гозъялöн школаö пырис и Таисия ныв, Платон котралö садйö. Бать-мам ыджыд тöдчанлун сетöны мойдъяслы, кодъяс велöдöны бурö. Оз сöмын лыддьысьны, но и видлалöны-донъялöны мойдын петкöдчысьясöс бур да лёк вöчöмторъяс серти. Мойдъяс кывзöны тшöтш аудиокнигаяс отсöгöн. Еремейкöд лыддьöны М.Горькийлысь да М.Достоевскийлысь висьтъяс. М.Горькийлöн «Старуха Изергиль» висьт серти донъялiсны, кыдзи морт сетчис омöльыслы, колис öтнас, лоис шудтöмöн. Став книгаыс мыйöкö да велöдö. 
Дзолядырйиыс быдтасъясöс видзам быд лёкысь. Мед розеткаö эз сюй чуньсö, сiйöс мыйöнкö да тупъям. Сиптам-каличалам жыръяс, кытчö пырны оз позь. А кыдзи видзны интернетысь, кöнi, овлö, велöдöны мöдарö? Александр Анатольевич серти, колö пыр сёрнитны, ворсны, öд челядь сöвмöны тайöн. Олöмыс пö ворсöм и эм, оз ков ныв-пиöс помся велöдны-юасьны. Овлö, бать-мам вердöны, песлалöны кöлуй, ньöбöны мый колö, но челядькöд оз сёрнитны. Гырысьджыкъясöс асывнас коллялöны «эн сёрмы школаö», рытнас вочаалöны «но, кыдзи школаад, лок сёй» кывъясöн, и ставыс. Олöны öтлаын, а пиыслысь либö нылыслысь олöмсö, сьöлöмкылöмъяссö оз тöдны. 
— Неважöн на Керчын вöлi зэв ыджыд лёктор. Вöлöмкö, верстьö оз тöдны, мый зонлöн юрас, мый тетрадяс, мый пызанас. Челядьыд кö веськодь, найöс öдйö быдторйö (вермас лоны, и лёкторйö) велöдас интернет, и мортöс шыбелитас код тöдас кытчö, — водзö сёрнитiс Александр Анатольевич. 
Еремей — айму аскиа дорйысь, семья лöсьöдысь-кутысь, вердысь. Колö кужны вöчны ставсö. Гозъя кыпöдiсны керка, подув кисьтöмсянь Еремей пыр вöлi батьыскöд орччöн, вöчис верманасö. Кужö и тувъясьны, пилитчыны. Батьыскöд тшöтш ветлö кыйсьыны-вöравны. Öтлаын вöйтöны-лэптöны, бöрти весалöны ботан. Зонка и бипуртö пестас, и нуръясянтортö лöсьöдас. 
Горт овмöс удж бергöдöны öтув жö. Весиг ичöт Платон петö ставныскöд град вылö. Сьöлöмсянь уджалö мукöд вылö видзöдöмöн. Еремей петö песла, сы бöрся вöтчö Таисия. Лым весавны зыр эм ставныслöн. 
— Быд удж бöрын гöтыркöд ошкам, кутшöм шаньöсь, зiльöсь миян челядь. Кутшöм öдйö да бура артмис öтув вöчöмöн. Öтув жö отсасям и миян мамъяслы, челядьлöн ыджыд мамлы да пöчлы. Еремей школаын тшöкыда кежавлö Таисиялöн классö, видзöдö, кыдзи сэнi олö чойыс, урокъяс бöрын ветлас и ыджыд мам да пöч дорö, мыйöнкö да отсыштö. Велöдам овны матыссаяс вöсна тöждöн, — пасйис айлов. 
Таисия да Платон ичöтöсь на. Он и тöдлы, кыдзи Еремей лэбзяс шуда позйысь. Александр Анатольевич оз шогсьы, мый сiйö кок кресталöмöн кутас виччысьны, мед кодкö отсалас, а ставсö вöчас ачыс, аддзас асьсö олöмас. Сiйö эскö пиыслы. 
Шойччан да Ен праздник лунъясö семьяöн ветлöны вичкоö, лэччывлöны и Ульянаö. Тöдчанлун сетöны Енлы эскöмлы. 
— Велöдöм кузя министр Наталья Михальченкова весиг пасйис, мый челядьöс колö быдтыны мывкыдаöн, тöждысьны налöн лов вöсна. Сыктывкарса да коми зыряналöн епископ Питиримкöд аддзысьлiгöн тöдчöдiсны, мый велöдан юкöнлы да вичкоын служитысьяслы колö уджавны öтув. Колö кутчысьны вежаяслöн шуöмъяслы. И медшöрыс — мед гортын ставныс вöлiны дзоньвидзаöсь, ловъяöсь. Стöча шуöмаöсь: медся тöдчанаыс — кутшöм поводдя гортын, — кывкöртiс Александр Анатольевич. 
Марина Дадашова. 
Снимок семьялöн чукöртöмысь.
Читать далее →

Октябр 18-öд лунö видз-му овмöс министерство нимöдiс медся бур уджалысьясöс, кодъясöс таво пасйисны почёт пöв вылö. На лыдын районын медся ыджыд «Помöсдiн» кооперативлöн Помöсдiнса юкöнöн веськöдлысь Мария Вячеславовна Уляшева, кодi видз-му овмöсын 28 во нин. Бригадиравлiс Бадьёльйывса юкöнын. Сiйöс сиптöм бöрын 2016-öд вося ноябрын вуджис Помöсдiнса юкöнö. Талун сэнi 100 мöс да сы мында жö кукань. Котырын куим лысьтысьысь да найöс öти вежысь. Куим скöтник, öти сантехник, йöв оборудование бöрся видзöдысь да кывкутысь оператор, слесар. 
Мария Вячеславовна котыртö став уджсö — скöтлы кöрым пыртöм да разöдöм, содтöдъясöн бура вердöм, лысьтысьöм, куйöд петкöдöм, скöт карта пелька кутöм да с.в. Бергöдö и бумага удж. Котырлöн бура да кывкутöмöн веськöдлöм тöдчис мöсъяслöн йöв вылö. Танi медся бур лысьтысьысьяс, кодъяс вонас öти мöслысь лысьтiсны куим сюрс килограммысь унджык йöв да содтысьöны воысь-во. Унджык йöв, унджык вöлöга — сiдзкö, кооператив босьтас унджык сьöм. 
Видз-му овмöс министерство пасйис Мария Вячеславовнаöс почёт грамотаöн. Кооперативлöн правление шыöдчис, мед уна во бура уджалысьöс почёт грамотаöн пасйисны Россия Федерацияса видз-му овмöс министерствосянь. 
Анастасия ЯРОВА, 
видз-му овмöс юкöнса начальник. 
Читать далее →

Николай Владимирович Зезегов пасйис 70 арöс — олöмын вель нин ыджыд тшупöд. Кыдзи ачыс шуис: танi чужи, танi ола, танi йöзыслы кола. 
Ручын чужлöм да быдмöм зон армияö ветлöм бöрын велöдчис трактористö, уджыштiс специальносьт серти. А сэсся совхоз мöдöдiс велöдчыны кузнечö. И со став уджыс, 40 во, öтилаын, «Ручевскöй» совхозын. Сэки совхозса директорöн вöлi В.В.Есев, сiйö вичмöдiс Николай Владимировичлы бур уджсьыс козин, сетiсны кузнечлысь 4-öд разряд. Тöв и гожöм, тулыс и ар кузнечаын кылiс мöлöт шы: сы мында техникатö колiс öд дзоньтавны, да и сиктсаясöс отсöгтöг он коль. Николай Владимирович некодлысь корöм эз бöрыньтлы. Ставыс быттьö ворсiс сылöн киясын — уджалiс сьöлöмсяньыс. Медводз вöлi бур трактористöн, сэсся кывкутöмöн уджалiс кузнечаын. 
Николай Владимировичлöн Анна Михайловна гöтырыс абу татчöс, Сыктывдiн районса. Юалi, кыдзи тöдмасисны. Гозъя кыкнанныс кутiсны нюмъявны. Миянöс пö тöдмöдiс Алексей вок, кодлöн Куниб сиктын вöлöма муса ныв. Сылöн Анна Михайловна нывъёртыс уджалiс вермытöмъяслöн сэтчöс интернатын. Зонлöн Кунибын гöститöм бöрын кык ныв воисны Ручö. Танi сэсся и тöдмасисны Анна да Николай. Но гозйöдчисны эз пыр. Олöмад тай быдторйыс овлö, но Анна Михайловна öнöдз видзö Николайлысь 1989-öд воын гижöм открытка: «Аня, ме локта март помын. Виччысь. Тырмас тэа-меалы йöйтавны. Окала. Коля». Сiйö жö воын Николай Елизавета Иосифовна мамыскöд мунiсны Кунибö коравны Аннаöс. Гозъя öтув олöны 29 во. Быдтiсны квайт челядьöс, сöмын тай öтка пиныс дженьыд нэма вöлöма. А вит ныв олöны асланыс семьяясöн, гажöдöны и квайт внук-внучка. 
Николай Владимирович гöтырыскöд лэптiсны керка-карта, век олiсны скöтöн, ас йöрöн. Кузиник тушаа, сёрнитö зэв лабутнöя, восьлалö тэрмасьтöг — татшöм и öнi на Николай Владимирович. Кузь нэм гозъялы, бур дзоньвидзалун и, кöть колис нин, а кыкнаннысö (Анна Михайловна пыр жö мырсис «Ручевскöй» совхозлöн порсь гидын) ыджыд праздникöн — видз-му овмöсын уджалысьяслöн лунöн. 
Екатерина УЛЬНЫРОВА. 
Руч. 
Зезеговъяс кудйысь босьтöм снимок вылын: ыджыд шуда семья (танi абу на ставныс).
Читать далее →

Кад 

Сулала сберкасса öшинь дорö сизим морта öчередын. Дзик ме водзвылын кык нывбаба, öтикыс тöдчымöн арлыдаджык мöдсьыс. Сёрнитöны ассьыныс олöмсö, ошйысьöны висьöмъясöн, казьтывлöны воддза кадсö. И уна сёрни пöвстас друг томджыкыс и шуö нывъёртыслы: 
— Господьöй Енмöй, а кадыс сэтшöм öдйö мунö! Оз весиг мун, а котöртö-пызйö. Эг и тöдлы, кыдзи арыс коли, öнi на быттьö выльвоасим, тулыс нин мыччасьö, а сэнi и бара гожöм. Вот и лэбыштö кадыс. Кытчö бара и тэрмасьö? 
— Чöв, чöв донаöй! Некор тадзи эн шу, некодлы тайö эн висьтав, весиг вунöд мöвпавнысö. Кадыс кыдзи мунö, мед сiдзи и мунас. Сэтшöма кö нин пыкö тайö могыс пытшкöсад, гусьöникöн мöвпав ас кежсьыд, некодлы нинöм эн явит. Тайö сёрнинад аслыд туналан кутшöмкö висьöм, семьяыдлы кутшöмкö шог — вот сэки кадыд и сувтас тэнад олöмын. Войыс оз кут кольлыны, луныс оз кут помасьлыны, ку пиад он кут тöрны. Йöймыны пондан, сьöлöмыд потласьны босьтчас, синъясыд синвасьыс пыкталасны сулалан каднас. Сэки нинöм нин оз отсав. Ас вывтi томдырйи мунiс, сiйöн и висьтала тэныд. Сöмын вичкоын лэдзис дырöн… Эн дöзмы сёрнитö дугöдöмысь, вай мыйкö мöдтор йылысь бурджык варовитам… 
Кыкнанныс öтпырйö ланьтiсны. Сiдзи сэсся и сулалiсны орччöн лöня, кыв лэдзтöг, öта-мöд вылас видзöдтöг, кадысь-кадö сьöкыда ышлолалöмöн. 
А ме сöмын сьöлöмсянь аттьöалi Енмöс, мый сiйö меным индiс кад да места лоны тайö сёрни бердас… 
Читать далее →