Тэ колян бур паметьын, Öдя!
Сувтöдiсны выльясöс
Лунвыв электрическöй сетьяслöн районса юкöн дасьтысьö тöв кежлö. Талун мастер В.А. Кочановлöн электромонтёръяс уджалöны юрсиктса Солнечная улича вылын, сувтöдiсны нин 24 выль сюръя, нюжöдасны провод да югзьöдасны. Буретш тайö уличаса олысьяс нимсянь республикаса юралысь С.А.Гапликовкöд веськыд йитöд дырйи шыöдчис ань, кодi керка кыпöдны му юкöн босьтлiс 2010-öд воын, семьянас овмöдчис 2014-öдын да корис югзьöдны. Юралысь тшöктiс югзьöдны октябр панасöдз. Пасъям, сиктлöн тайö юкöнын урчитöма сетны 20 гöгöр му юкöн. Кыпöдöм кöкъямыс керкаысь квайтас олöны нин.
Водзмöстчö депутат
Ульяна сиктысь Маргарита Александровна Есева кык во нин овмöдчöминса депутат. Оз пукав гортас, пыр мыйкö вöчö. Зэв казьтыланаöн колисны Победа да Ульяналы сиöм лунъяс пасйöм. Победа лун пасйигöн выльторйöн лоис сiйö, мый Маргарита Александровна вöзйöмöн греча рок вайисны эз Озъягысь, а пуисны Ульянаын. Депутатлöн водзмöстчöмöн кыпыда артмис и сиктлысь лун пасйöм. Ыджыд бурторйöн лоис сiйö, мый видз-му овмöсса министерстволöн отсöгöн вичмöдiсны челядьлы ворсанiн вöчöм могысь сьöм. Сiйöс локтан воын лöсьöдасны асьныс.
Тöдöй, мый выльыс
Оборона кузя министерстволöн вузъясö районысь вермисны пырны куимöн да август 1-öд лунсянь велöдчöны нин.
Медицина кузя Санкт-Петербургса военнöй академияын велöдчö Пожöгысь Ирина Смирнова. Парчысь Пётр Карманов пырис национальнöй гвардиялöн Перымса военнöй институтö, Скöрöдумысь Ярослав Ефремов М.А.Бонч-Бруевич нима Санкт-Петербургса академия бердын военнöйясö велöдан шöринö.