Архив за день: 27.09.2018

Миян йöз

— Мед уджавны садйын, челядьтö колö радейтны, быдöнöс кывзыны да кужны гöгöрвоны, — висьталö воспитатель С.Е.Рассыхаева. 
Чужис Донын, школа бöрын велöдчис вузасьысьö. Уджыштiс сберкассаын. Сэсся ассьыс челядьсö вайис садйö да корисны уджавны сэтчö. Босьтчис, и ньöти эз каитчы. Воспитательö велöдчис уджысь орöдчытöг. Нэмсö зiлис Кулöмдiнса коймöд номера садйын. Кыдзи висьталö ачыс, некор эз горзывлы челядь вылö. Пыр веськавлiсны бур бать-мам, кодъяс сьöлöмсянь отсасисны. А накöд öд воспитательлы тшöтш колö кужны уджавны. Öнi быдторйыс эм интернетын, а водзын Светлана Егоровна ставсö корсьысис библиотекаысь. Лунся узьöм водзвылын век лыддьысис челядьлы. Найö велалiсны да асьныс сэсся кутiсны корны. Таво садйын уджалöмлы тырис 30 во. Сы мында каднад, дерт, вöлiны уна вермöмъяс. Бöръя шедöдöмторъясысь позьö казьтыштны, кыдзи «Вöр-валöн том ёртъяс» вермасьöмын найö лоисны мöдöн. Зэв бура петкöдчисны «Ёртасян кытш» гажын. Велöдан министерствосянь уна во уджалöмысь волiс почёт грамота. Светлана Егоровна уна вын сетiс коми кыв велöдöмлы. Кывбуръяс, сьыланкывъяс, шусьöгъяс — ставсö зонпосни велöдiсны сьöлöмсянь. Уджалiс коми культура кузя дасьтöм уджтас серти. Таво Светлана Егоровна петiс шойччöг вылö. Ёна гажтöмтчö челядьысь. 
Садйöн веськöдлысь О.Р.Кравченко висьталiс: 
— Светлана Егоровна — зэв сяма морт: мичаа серпасасьö, быдтор кужö вöчны. Быдлаын петкöдчö, нинöм оз бöрыньт. Удж вылын сiйöс ёна пуктöны пыдди. 
Гижöд да снимок Галина КЛЮЖЕВАЛÖН.
Читать далее

Ставсö вöчöны öтув 

Тöдмасьöй: Югыдъягысь Нина Тимофеевна да Алексей Васильевич Шешуковъяс. Районса олöма йöзлöн «Ошлöн вöр» шойччанiнын чукöртчылöм вылын найö лоисны медся аслыспöлöс да нырччысь гозъяöн. 
Нина чужлiс Сьöдтыдiнын, Алексей Вапöлкаын. Кор найö вöлiны челядь на, Ниналöн бать-мамыс волiсны Алексейлöн чужанiнас кутшöмкö гаж дырйи, ветлöдлiсны керкаысь керкаö и пырисны Шешуковъяс дорö. Висьталiсны, мый налöн эм Алексей кодь арлыда ныв, и быдмöм бöраныс найöс гöтрöдасны. Налöн мунöм бöрын Алексей бöрддзис: «Ог кöсйы гöтрасьны». Кор зонлы тырис 18 арöс, тöд вылас усис тайö лоöмторйыс да шуис ветлыны видзöдлыны, код вылö сiйöс кöсйисны гöтравны. Ныла-зонма мусмисны öта-мöдныслы. Сiйö кадсяньыс и öтлаынöсь. 
Нина велöдчис техникумын бухгалтерö, Алексей сварщикö. Велöдчöм бöрын нылöс мöдöдiсны уджавны Печораö, а зонмöс Немдiнö. Öтвылысь мунiсны Немдiнö, олыштiсны тöлысьысь унджык. Ниналы сэнi уджыс эз вöв. Вöзйисны Мысысь удж, но сэнi эз вöв оланiн, да и сьöлöмныс сэтчö эз кыскы. Мунiсны Усть-Нем Базаö (öнi Югыдъяг) да сэтчö и вужъясисны. 1972-öд воын гöтрасисны. Дзик пыр кыкнанныслы сюрис удж: верöссö босьтiсны леспромхозö сварщикöн, а гöтырыс зiлис бухгалтерöн. Чужисны куим челядь. Öти на пиысь абу нин ловъя. Сергей пиыс олö карын, уджалö лесовоз вылын, эм куим челядь. Светлана нылыс олö Югыдъягын, уджалö олöмаяслöн да вермытöмъяслöн керкаын. Сiдзжö куим челядя. Шешуковъяслöн 7 внук-внучка нин. 
Гозъя кöть и кыкнанныс шойччöг вылынöсь, оз на пукавны гортас. Сьылöны «Мадаяс» котырын. Алексей Васильевич сöмын во на, а Нина Тимофеевна вит. Ветлöдлöны-петкöдчöны район пасьта: вöлiсны Смолянкаын, Белоборскын, Донын, Кулöмдiнын и с.в. Ветлiсны и карö. Сьывны велöдö А.И.Ковальчук. Мича паськöм вурöдiс Н.А.Журавская. 
Алексей Васильевич ёна радейтö шахматы, нуöдö клубса лыддьысянiнын челядьлы кружок. Неважöн вöлi шахматы да шашки кузя вермасьöм да Алексей Васильевич лоис медводзын, а сылöн Денис да Саша внукъясыс мöдöн да коймöдöн. Окотапырысь нин легöдöны шахматысö и дзоля внучкаясыс, тöдöны, кытчö мый пуктыны. 
Верöсыс тшöкыда ветлывлö олöмаяслöн керкаö. Сэтчöс олысьяслы зэв нимкодь, öд Шешуковъяс век дасьтöны гöстинечьяс, чöскыд пöжасъяс да нуöны пöрысь йöзлы. Быд гаж дырйи сэтчö волö «Мадаяс» котыр. Найöс пыр виччысьöны да юасьöны, кор воласны нöшта. 
Дерт, уна удж тырмö гортын, вöдитöны градъяс, и ставсö вöчöны öтув. Öнi дзоньталiсны керкасö. Водзын видзлiсны уна скöт: кроликъясöс, мöскöс, порсьöс, коркö весиг кык мöс вöлi. Сэсся вочасöн дугöдчисны. Бöръя кадö Алексей Васильевич кутiс ёнмöдчыны: котралö лыжиöн, ветлöдлö велосипедöн. Ёртъясыскöд чукöрмылöны сизим мортöдз. А водзыннас шпуткис-тшынасис, ышмывлiс и юыштöмöн. Сэсся ветлiс Эжваö «Вита» шойччанiнö да корис, мед сылы отсаласны дугöдчыны куритчöмысь. И дугдiс öд! Кыдзи ачыс ошйысис, куритчан вылö видзтöм сьöм вылö шедiс пластик лыжи да колана кöм. А гöтырыслы долыдыс! 
— Ме шензя аслам верöс вылö. Ставсö кужö, сэтшöм зiль да киподтуя: телевизортö лöсьöдас, битö вöчас, пачтö тэчас — быдлаö пырöдчö, сяммö, — нимкодя висьтасис Нина Тимофеевна. 
Быд вторник да четверг гозъя ветлывлöны клубса лыддьысянiнö. Сэнi уджалысь Г.А.Карманова нуöдö быдпöлöс юалана ворсöм да гаж, пыр ветлöны окотапырысь да тöдмалöны мыйкö выльтор. Тöдмасьöны и библиотекаö воысь выль книгаясöн. Водзынджык олöма йöз чукöртчывлiсны чужан лун дырйи, юлiсны чай, сёрнитiсны. Нина Тимофеевналöн кывъяс серти, налöн клубын уджсö котыртöма зэв бура, гажтöмтчыны дзик некор. 
Алексей Васильевич пырö олöмаяслöн сöветö да найöс гöтырыскöд мöдöдiсны Аныбö чукöртчылöм вылö. Таво мунiсны мöдысь. Гозъя серти, татшöм чукöртчылöмъясыс зэв коланаöсь, тöдмасьöны выль йöзкöд. Волывлöны быдпöлöс котыръясöн веськöдлысьяс, бурдöдысьяс, ставсö висьталöны, велöдöны. Таво со Нина Тимофеевна велöдчис кыны шöрт сунисысь вöнь. Быдöн аддзис аслыс сьöлöм серти удж. 
Колян вося чукöртчылöм вылын куим гозъя костысь Шешуковъяс лоины медводзын. Налы нуöдiсны уна сикас вермасьöмъяс. А таво со бара лоисны медбурöн. Зэв ёна чуймисны, кор шуисны найöс. Чайтiсны, вермасны Трегубовъяс гозъя. Мöд во бара на кöсйöны ветлыны. 
— Миян ставыс бур, мед сöмын дзоньвидзаöсь вöлiм-а. Долыд, мый челядь сувтiсны кок вылö, найö да внук-внучкаясным зэв шаньöсь. Челядь ёна отсасьöны, внукъяс весиг отсалiсны лэптыны пывсян. Сэтшöм мичаникöс кыпöдiсны, любö видзöдны. Тадзи и олам. Öтув бергöдам став сьöкыдсö да нимкодясям быд бур юöрлы, — юксис Нина Тимофеевна. 
Нимкодь, мый эмöсь быдлаö пырöдчысь йöз, кодъяслы арлыд оз ло мытшöдöн. Миянлы, томъяслы, позьö унаторйö велöдчыны налысь. 
Гижöд да снимок 
Галина КЛЮЖЕВАЛÖН.
Читать далее

Казьтыштöй томлунтö 

Пыдди пуктана лыддьысьысьяс! Таво октябр 29-öд лунö ми кыпыда пасъям тöдчана лыдпас — комсомоллы 100 во тырöм. Важöн нин абу страна, кöнi коркö вöлi тайö котырыс. 27 во сайын комсомоллöн 1991-öд вося сентябр 27-29-öд лунъясö мунысь бöръя съезд юöртiс, мый

Читать далее

Нимсö пасйöма книгаын 

Дiасёръяысь Бронислав Васильевич Никифоровский ыджыд пай пуктiс вöр овмöс сöвмöдöмö. Сiйö чужлiс 1938-öд вося октябр мöдöд лунö Помöсдiнын уна челядя семьяын. Кöкъямыс класс помалöм бöрын уджалiс «Чапаев» колхозын, а сэсся армияöдз Усть-Немскöй леспромхозлöн Смолянкаса лесопунктын трактористлы отсасьысьöн. Служитiс Германияын да Тамбовын. Армия бöрын уджыштiс Помöсдiнса леспромхозлöн Великопольеса лесопунктын, сэсся 18 во трелюйтчис да сöвтiс вöр Вöльскöй лесопунктын. Социалистическöй ордйысьöмъясын вермысь, коммунистическöй уджвывса да 11-öд пятилеткаса ударник. Пенсия вылö петöм бöрын вит во на уджалiс электростанцияын. 
Гöтырыскöд быдтiс да ас олöмö петкöдiс кöкъямыс челядьöс. Бур уджсö пасйисны «За трудовую доблесть», «Ветеран труда» да юбилейнöй медальясöн, почёт грамотаясöн. Бронислав Васильевичлысь нимсö пасйöма М.К.Игнатовлöн «Гордость и трудовая слава Усть-Куломского района» книгаын. 
Нина Шатохина. 
Дiасёръя.
Читать далее

Свежий выпуск: 28 марта

Осторожно — мошенники!