Кольöм вося июньын Росгвардиялöн Коми республикаса управление индiс районын юкöнса начальникöн полицияса майор Виктор Николаевич Аскеровöс, кодi 14 во уджалiс пытшкöсса делöяс министерстволöн юöръяс сетан шöринын.
— Видзöдам, мед öружиеöн вöдитчысьяс кутчысисны урчитöмторъясö. Мортыс кö кöсйö ньöбны öружие, эм дзоньвидзалун кузя бурдöдчысьяслöн кывкöртöд, велöдчис ДОСААФ-лöн Сыктывкарса юкöнын, шыöдчö миян дорö. Видзöдлам öтувъя юöръяс видзанiнысь, эз-ö сiйöс кыскывлыны административнöй либö уголовнöй кывкутöмö, мынiс-ö уголовнöй мыждылöмысь. Ставыс кö бур, вöлисти сетам лицензия, мед ньöбны шыльыд ствола öружие. Вит во мысти сöмын позяс босьтны нарезнöйöс. Нюжöдам и кад кольöм бöрын öружие новлöдлöм да видзöм вылö лицензия. Кольöм воын юкöнö шыöдчылiс сюрс гöгöр морт. Кольöм вося октябрсянь тöдчымöн содiсны юкöнöн могмöдöмысь донъяс. «Государственные услуги» портал пыр шыöдчысьяс вештöны 30 процентöн этшаджык, — сёрнитiс В.Н.Аскеров.
Юкöн топыд йитöда участокса уполномоченнöйяскöд. Найö видзöдöны, мед öружие да пуля-порок видзисны игана сейфын, пыдди пуктiсны öружие новлöдлöм кузя урчитöмторъяс, öлöдöны, мед эз вöчны административнöй мыж да ас кадö нюжöдiсны лицензия, мед эз видзны гортаныс пасйытöм öружие. Кольöм воын районса олысьяс ас окотаöн сдайтiсны квайт öружие, таво öтиöс на. Таысь сетсьö сьöм. Йöз, кодъяслöн эм öружие, кызвыннас вöралысьяс. На лыдын 20 гöгöр ань, кодъяс кыйсянторъяссö пасйисны юкöнын. Найö абу сöмын ылi сикт-грездъясысь, кöнi олöны ёнджыка кыйсьöм-вöралöм помысь, но и Кулöмдiнысь, Керчомъяысь да Ручысь.
Гижöд да снимок Марина ДАДАШОВАЛÖН.