— Туй вöчысьяслöн сиптысьöм котырсянь, кöнi ме пöртi олöмö веськöдлысьлысь могъяс, сиктса ломтысянiнö мастерöн босьтiсны 2008 воын. Вöвлöм совхозлöн ломтысянiныс, кодöс босьтiс «Шоныд сетан Коми компаниялöн» Кулöмдiнса юкöн, вöлi важ, пöртъяс пыр потласисны, ёна кöдзыдъяс дырйи кынмавлiсны, öтарö дзоньтасим. Мыссянiн эз вöв, да шахтаын уджалысьяс моз гортö мунлiм сьöд чужöмъясöн да киясöн, — казьтылiс Степан Васильевич.
2013 вося гожöмын вайисны кык выль пöрт, но найö эз лöсявны важ ломтысянiнö да сы дорö шлакоблокъясысь асьныс кык тöлысьöн кыпöдiсны содтöд. Уджалан котырын вöлiны ыджыд сяма Н.В.Лобанов да С.В.Рассыхаев, босьтiс и томъясöс — М.И.Ульныровöс да Н.И.Пименовöс. Уна бур вöчис Кулöмдiнса шöр ломтысянiнысь сваритчысь В.И.Булышев. Шоныдöн могмöдан сад, школа, культура керка да администрациялöн керка дорö содiс регыд на восьтöм кусöдчысьяслöн керка. Мöд вонас лöсьöдiсны уджалысьяслы торъя жыр, мыссянiн, асмогасянiн. С.В.Рассыхаев да Н.И.Пименов вуджисны мöдлаö, на пыдди локтiсны Н.В.Нестеров да И.Н.Расов. Сэксянь тöвйöны век бура, сы вöсна мый тöв кежлö дасьтысьöны ыджыд кывкутöмöн.
Марина ДАДАШОВА.
Снимок Дмитрий Кирушевлöн.