Дзик на неважöн сиктъясын вöлiны асланыс кöлуй да кöмкот вуран-дзоньталанiнъяс. Сэнi позис и юрситö лöсьöдыштны-шырыштны. Кольöм нэмся 90-öд воясö гудыртчылöм олöмыс чышкыштiс вужнас ставсö овмöдчöминъясысь, кöть найö пыр вöлiны йöзаöсь да и уджнад кымын олысьöс могмöдiсны. Но сьöкыдлун вылö видзöдтöг пыр сюрлiсны водзмöстчысь йöз, кодъяс нюжöдлiсны отсöга ки пикö воöмаяслы.
Надежда Константиновна Зайкова (Шебырева) 1982-öд воын Пожöг шöр школа помалöм бöрын водзö тöдöмлун босьтiс юркарса 28-öд училищеын и петiс сэтысь нывбабаяслы кокни кöлуй вурысьöн. 1984-öд восянь кöкъямыс во вурсис Пожöг сиктса КБО-ын. Кöть и вит нывбаба шöрасис-вурсис-дöмсис сэнi — уджыс пыр вöлi юр выв тырныс. Но юась-висьтасьтöг другысьöн ставыс сиптысис-быри. Уджалысьяс и сиктсаяс колисны шемöс. Уджтöмалысьяслы колö на öд мый вылöкö овны, котыртö вердны-пасьтöдны. Надежда Константиновналы вöзйисны садйысь удж. Завхозалiс-бергалiс ичöт войтыр гöгöр сизим во. Сы бöрын быдса кык во на мойвиис вузасьыштны магазинын.
2005-öд воын кутчысис бöр аслас радейтана уджö, лоис ас вылö уджалысьöн. Та могысь Алексей Ахабьевич верöсыскöд йöр помас лэптiсны пелькиник куд кодь керка. Кымынкö аттьö и шуисны сикт-грездса аньлы водзмöстчöмысь. Визув олöмысь бокö дзебсьыштöм грездъясад тай пыр мыйкö колö вурыштны-дзоньтавны-дöмыштны, он тай уськöдчы карса моз кытчöкö могмöдчыны.
Удж дорас Надя Зайкова, сиктса ногöн кö, матыстчö зэв кывкутöмöн, киподтуйыс пыр и шыбитчö синмад. И мый казялiсны сьöмöн дзескыдджыка олысьяс — некор оз донсьöдчы, кöть и вурöмаыс-дасьтöмаыс фирменнöй кöлуйсьыд оз торъяв. Оз öд прöста сiдз сиктса сцена вылын петкöдчысьыс сыöн вурöм кöлуйöн бергав. Тайö небыдик нюма аньыс абу сöмын мичаа вурсьысь, но и пусьöм-пöжасьöмнад Енмыс абу жö дзерöдöма. А гожся öшинюв йöрыс — дзоридзöн тырöм Эжва бокса видз. Буракö, небыдик да тöждысьысь сьöлöмсö кылöны быдтасъясыс, легöдыштöны юръяснас, нимкодялöны кöзяйкалысь синъяссö.
2019-öд воын Н.К. Зайкова пенсия вылö петöм бöрын дугöдчис ас вылö уджалöмысь, буракö, дöзмöма бумага-кабаласö помтöг парсалöмысь. Но ичöтик жыръя керкаыс пыр биа — сьöлöмсö бурöдö вурсян машина сайын.
Гижöд да снимок Владимир ШОМЫСОВЛÖН.