[ A+ ] /[ A- ]

Декабр мöдöд лунö Тимшерысь Арнольд Данилович Кирстлы тырас 100 во. Тайö зэв тöдчана тшупöд. Аслас нэмöн олöма морт вуджöдiс уна сьöкыдлун. 
Чужис сiйö 1919-öд воын Житомир обласьтлöн Черняховскöй районса Андреево сиктын. Бать-мамыслöн найö вöлiны квайт ныв-пи. Арнольд асланыс сиктса школаын сöмын на помалiс кык класс, кыдз налысь семьясö кулачитiсны да мöдöдiсны Карелияö. Тайö вöлi 1935-öд воын. Война пансян воын мöдöдöмъяскöд Эжва ю кузя вайисны миян районса ылi вöрса посёлокö, кодöс шуисны коймöд участокöн. Тайö вöлi Лöкчимлаглöн лагпункт, кытöн овлiсны мыждöм йöз. Танi бергöдчисны зэв сьöкыда: тшыгъялiсны, кынмалiсны, тöдлiсны помтöм удж. Унаöн кулалiсны, тшöтш и мамыс. Батьсö да Виктор воксö, кыдзи и уна мукöд немечöс, мыждiсны нинöм абусьыс да пуксьöдiсны дзескыдiнö, кöнi кувсис батьыс. 1944-öд воын Арнольд вуджис овны Тимшерö. 1946-öд воын гöтрасис. Коркö дыр мысти вичмöдiсны налы выль кыпöдöм кык патераа керкаысь оланiн, кöнi и пыр на олö. 1949-öд воын леспромхозö, кöнi Арнольд Данилович уджалiс пилитчанiнын, вайисны бульдозеръяс. Сы вылын некод эз кöсйы уджавны, сы вöсна мый вештiсны этша. Айловöс пуксьöдiсны сы вылö мырдöн, шуисны: «Он пуксьы — йöршитам дзескыдiнö». Быть ковмис кöсйысьны, öд сiйö пыр на вöлi комендатуралöн видзöдлас улын. Киритiсны сэтысь сöмын 1955-öд воын на. Арнольд Данилович сiдзи и уджалiс бульдозер вылын пенсияöдзыс, да правотöгыс на. Сiйöс сетiсны сöмын 1974-öд воын бура уджалöмысь ыдждöдланторъяс вичмöдiгмоз. 
Арнольд Даниловичлöн куим пи: медыдж-ыдыс, Виктор, висьöмысла кувсис нин 1968-öд воын, Роберт да Гарик дыр олiсны Тимшерын, уджалiсны леспромхозын водительöн. Öнi кыкнанныс олöны Германия-ын. Ветеранлöн кöть челядьыс да внук-правнукъясыс олöны сыысь ылын бокын, но сiйö оз майшась, пыр кыпыд лола. 
Валентина Белова, Тимшерса юралысь. 
Снимок Наталья СОЗОНОВАЛÖН.

Комментарии:

Добавить комментарий

Свежий выпуск: 28 марта

Осторожно — мошенники!