Миян йöз

[ A+ ] /[ A- ]

Сентябр мöдöд лунö район пасьтала мича дзоридзьясöн челядь мунiсны школаö. Шöръягса школаын таво велöдчö 42 ныв-зон, а школаöдзса котырö ветлöдлö 23 челядь. 2016-öд восянь школаöн веськöдлö Елизавета Александровна Жирютина. Медводдза классö таво пырисны кыкöн: Костя Третьяков да Нина Тарабукина. Найöс велöдö Зинаида Аипаловна Пахомова. Школаын да садйын уджалö ыджыд сяма, енбиа 14 велöдысь. Шöръягса школаысь велöдчысьяс тшöкыда вермöны быдпöлöс конкурсъясын да олимпиадаясын. Кольöм воын муниципалитетса тшупöда олимпиадаясын лоисны вермысьöн витöн: Олеся да Лариса Напалковаяс, Елена Булышева, Арсений Шахов да Лия Напалкова. На пиысь куимöн петкöдчисны регионса тшупöдын. Öкмысöд класс помалысь Елена Булышевалы сетiсны районса администрацияöн веськöдлысьсянь стипендия. Сiйö велöдчис бура, быд во петкöдчис олимпиадаясын да петалiс вермысьöн. Тавосянь водзö велöдчö Кулöмдiнса школаын. 
Олеся Напалкова некымын во нин вöлi вермысьöн «Аттьö пöльлы вермöмысь» конкурсын. Таво сылöн уджыс республика пасьтала öтнаслöн вöлi коми кыв вылын. Сетiсны гран-при, козинöн лоис Санкт-Петербургö ветлöм. 
Быд гожöмын челядьлы котыртлöны гожся уджалан лагер да площадка. Таво гожся уджалан лагеръяс восьтiгöн Шöръягса ныв-зон лоисны медводдзаясöн. 
Школаын пыдiсянь велöдöны коми кыв. Нуöдöны шахмат да теннис кузя, «том корреспондент», ас киöн вöчасьысьяслысь да чужан му туялысьяслысь кружокъяс. 
Уна во нин уджалöны велöдысьяс Т.А.Напалкова, Э.Н.Напалкова, С.В.Касьянова да З.А.Пахомова. 
Галина КЛЮЖЕВА. 
Олеся Напалковалöн 
снимок вылын: мöдöд да нёльöд класса велöдчысьяс С.В.Касьянова велöдыськöд.

Комментарии:

Добавить комментарий

Свежий выпуск: за 19 сентября