[ A+ ] /[ A- ]

Кад 

Сулала сберкасса öшинь дорö сизим морта öчередын. Дзик ме водзвылын кык нывбаба, öтикыс тöдчымöн арлыдаджык мöдсьыс. Сёрнитöны ассьыныс олöмсö, ошйысьöны висьöмъясöн, казьтывлöны воддза кадсö. И уна сёрни пöвстас друг томджыкыс и шуö нывъёртыслы: 
— Господьöй Енмöй, а кадыс сэтшöм öдйö мунö! Оз весиг мун, а котöртö-пызйö. Эг и тöдлы, кыдзи арыс коли, öнi на быттьö выльвоасим, тулыс нин мыччасьö, а сэнi и бара гожöм. Вот и лэбыштö кадыс. Кытчö бара и тэрмасьö? 
— Чöв, чöв донаöй! Некор тадзи эн шу, некодлы тайö эн висьтав, весиг вунöд мöвпавнысö. Кадыс кыдзи мунö, мед сiдзи и мунас. Сэтшöма кö нин пыкö тайö могыс пытшкöсад, гусьöникöн мöвпав ас кежсьыд, некодлы нинöм эн явит. Тайö сёрнинад аслыд туналан кутшöмкö висьöм, семьяыдлы кутшöмкö шог — вот сэки кадыд и сувтас тэнад олöмын. Войыс оз кут кольлыны, луныс оз кут помасьлыны, ку пиад он кут тöрны. Йöймыны пондан, сьöлöмыд потласьны босьтчас, синъясыд синвасьыс пыкталасны сулалан каднас. Сэки нинöм нин оз отсав. Ас вывтi томдырйи мунiс, сiйöн и висьтала тэныд. Сöмын вичкоын лэдзис дырöн… Эн дöзмы сёрнитö дугöдöмысь, вай мыйкö мöдтор йылысь бурджык варовитам… 
Кыкнанныс öтпырйö ланьтiсны. Сiдзи сэсся и сулалiсны орччöн лöня, кыв лэдзтöг, öта-мöд вылас видзöдтöг, кадысь-кадö сьöкыда ышлолалöмöн. 
А ме сöмын сьöлöмсянь аттьöалi Енмöс, мый сiйö меным индiс кад да места лоны тайö сёрни бердас… 

Черань 

Дзолядырйи, помнитсьö, ми, зонпосни, аддзöм гагтö ёна некор эг жалитлöй, унджыкысь вилiм. А миян арлыда нывъясыд вöлiны рамджыкöсь, лöньджыкöсь, та вöсна этша и полiсны, матысь кö ас дорсьыс казявлiсны гагтö. А тшук кö кöлуй либö юрси вывсьыныс индан налы, чеччалöмöн да чилзöмöн ас вывсьыныс гаг пыркöдöмсö позьö видзöдны концерт моз. Но татчö колö шуны, мый бобувъяссьыд миян сиктса нывъяс эз повны, мöдарö, асьныс вöтлысисны на бöрся да нимкодясисны налöн мичлунöн. 
А со чераньтö ми некор эг вилöй, кöть эськö найö, миян видзöдöм серти, медся повзьöдчанаöсь да зывöкöсь. Миян пöчöяс дзолясянь чорыда öлöдлiсны, мый дзик некутшöм черань вöрзьöдны оз позь, а виöм кузя весиг сёрни абу. Мыйла юалöм вылö старукаяслöн вöлi öти вочавидзöм: 
— Мöслöн вöраыс косьмас. 
И ставыс. Кыдзи черань виöмыс да мöслöн вöра косьмöмыс öта-мöдыскöд йитчöмаöсь, некор эз гöгöрвоöдны. 
И со ме, верстьö морт, кодлöн важöн нин гидас абу мöс ни кöза, медводз велöдi ассьым челядьöс, а öнi öлöда внук-внучкаöс, мый чераньöс вины некор оз позь. А налöн мыйла юалöм вылö пöч моз жö вочавидза: 
— Мöслöн вöраыс косьмас. 
И кыдз тi чайтанныд? Уджалöны тайö кывъясыс! Кöть эськö син сертиыс аддза, мый эз гöгöрвоны, кутшöм мöслöн кытi косьмас. Кута лача, мый коркö найö быдмасны да сiдз жö велöдасны ассьыныс челядьсö пыдди пуктыны оз сöмын чераньöс, но и Енмöн сетöм быд ловъя лов. 

Николай Игнатов. 
Помöсдiн.


Комментарии:

Добавить комментарий

Свежий выпуск: за 8 ноября