[ A+ ] /[ A- ]

Челядьлы зэв нимкодь, кор на дорö локтö выль велöдысь. Налöн юрас бергалö уна юалöм: кутшöм сiйö, кыдзи велöдö, а, гашкö, сiйö лоö медрадейтанаöн. Таво Вочса школаö воис Николай Иванович Морохин. Ачыс Улыс Вочысь, велöдчис колледжын физкультура велöдысьö. Студенталöм казьтылö сöмын бур боксянь: нёль во чöж ветлöдлiс дзюдо вылö. Гожöмъясын уджавлiс «Чайка» лагерын.Велöдчигöн босьтiс ГТО-лысь зарни пас. Эм судейскöй карточка. Весиг ачыс вермö примитны ГТО. Колледж помалöм бöрын бергöдчис чужанiнас. Сетiсны велöдны 8, 10, 11 классъясын ОБЖ. Сiдзжö посни классъясöс велöдö ворсны ичöт футболысь. Велöдысьöн кöсйис лоны важöнсянь нин, кор ачыс на вöлi школаын. Ёна пырöдчис спортö. Уджыс воö сьöлöм вылö, челядь кывзысьöны, окотапырысь босьтöны тöдöмлунъяс. Зонлöн чайтöм серти, колö, мед вöлi унджык практическöй юкöн. Тадзи унджыктор кольö юрас, да и гöгöрвоанаджык. Казялiс, мый нывъяслöн юрас бурджыка кольö теория, а зонъялы ставсö колö вöчны ас киöн. Быд во арнас Кулöмдiнын овлö ориентирование кузя вермасьöм. Николай Иванович дасьтö челядьöс, кöсйö бытьысь вайöдлыны. Велöдö ветлöдлыны компас да карта серти, мед эз вошны вöрын. Тöдмасьöны пасъясöн. 
Зон быдмис уджач сиктса семьяын: бать-мамыс зiльöны садйын. Ыджыдджык Клавдия чойыс олö да уджалö Ухтаын шылад велöдысьöн, Елена Кулöмдiнса школаын вожатöй. Шойччан лунъясö Николай ветлывлö кыйсьыны, тайö сылы вуджис батьсяньыс. Ёнмöдчö, оз куритчы да оз ю. Гöтыртöм на. Водзын сiйöс виччысьö армия — шуисны, мый босьтасны таво ар. Сы бöрын зэв ёна окотитö уджавны физкультура велöдысьöн. 
Кöть уджалiс сöмын тöлысь, школаса директор Ж.В.Ревеняла бур кывйöн пасйис том велöдысьöс: 
— Уджалö бура, кывкутöмöн, зэв шань, оз ю и оз куритчы. Жаль сöмын, мый ноябрын босьтöны армияö, недыр и удитас уджыштны. 
Галина КЛЮЖЕВА. 
Гижысьлöн снимок вылын: Н.И.Морохин велöдысьяслöн тавося чукöртчылöм вылын районса администрацияöн веськöдлысь С.В.Рубанкöд.
 

Комментарии:

Добавить комментарий

Свежий выпуск: за 13 декабря