Кужйын чужлöм, öнi Кулöмдiнын олысь Татьяна Игоревна Щипунова öкмыс класс помалöм бöрын велöдчис Сыктывкарса целлюлозно-бумажнöй техникумын, лоис тшöтайтчан машинаясса техникöн. Уджалiс редакцияын, кадастрöвöй палаталöн районса юкöнын инженерöн. Уджысь орöдчытöг помалiс Вяткаса видз-му овмöс академия, шедöдiс экономистлысь специальносьт, кодi зэв на и лöсялiс. Шуис восьтны асшöр удж. Босьтчис сыö мартын, а майын восьтiс нин «Фото*сувенирка» лавка. Вузалö фотоöн и гижöдöн мичмöдöм кружкаяс, футболкаяс, магнитöн стенö либö мукöдлаö öшланторъяс, тасьтiяс, часi, юрлöс да уна мукöдтор. Эмбурсö босьтö карса асшöр уджалысь пыр, а мичмöдö найöс йöзлöн корöм серти ачыс. Бура мунöны торъя нима либö мамлы-батьлы, пöльлы-пöчлы сиöм кружкаяс. Ань висьталiс, мый районлöн чужан лунö ньöбалiсны сiйöс весиг семьяясöн, тайö тöдчана лун кузяыс öта-мöдныслы вöчисны козин. Йöзлöн корöмöн вöчалö наöн вöзйöм снимокъяса либö мича серпасъяса календаръяс. Ньöбасьысьяслысь корöмъяссö тöдвылö босьтöмöн, козинъяс вöчö и ачыс, ичöтик öткаясöс либö чукöраясöс. Сiйö вöчалö и фотояс. Ньöбасьысь вочасöн содö. Öткымынъяс, ёнджыкасö тöдсаяс, корöмъяс вöзйöны весиг интернет пыр. Быдöнлы мунö воча, кадöн артасьтöг: дасьтыны козин да вöчны фотояс ковмылö и рытнас. Уджалан жырсö кöртымалö. Кок йылö зумыда сувттöдз, висьталö, ылын на. Медым лоис унджык ньöбасьысь, колö вöчны унапöлöсджык да унджык вузалантор. Матысса кадö шуис пыртны фотокристалл — стеклö вылын фото, кодi видзöдсьö зэв мичаа. Эмöсь и мукöд мöвпъяс. 
Гижöд да снимок 
Галина Нестеровалöн.