[ A+ ] /[ A- ]

Енмöс нимöдöмöн 
Ручысь Ангелина Александровна Кирушева матö тöлысь серпасасьö Ульянаса манастырысь Николай Чудотворецлöн вичкоын, кодi кöлöкöльнялöн мöдöд судтаын. Пырöмсянь синъястö гажöдöны уна рöмöн мичмöдöм серпасъяс. 
Ангелина Александровна висьталiс: 
— Вичко — сiйö Енлöн сарство. Юксьö Енэж, Вежа Му да Му вылö. Мичмöдны найöс колö торъя индöдъяс серти. Енэжын мед вöлiны анделъяс, Господь, Вежа Муын — Евангелиеысь босьтöмторъяс, кыдз Ен Мам, апостолъяс, Му вылын — вежаяс. Медводз босьтчи вöчавны посни серпасъяс. Найö босьтöны уна кад, но уна рöмöн тöдчымöн гажöдöны вичко пытшкöс. Уджыс уна да нюжалас ар помöдз. Кытчöсюрö колялам кушинъяс да локтан воын сэтчö серпасалам öбразъяс. Ёна отсасьö меным Ручысь жö том морт Вячеслав Расов. Кор кадныс эм, волöны вежа айяс да весиг манастырö волысьяс. Найö бала серти вöчалöны мыгöръяс, а ме сэсся мичмöда. 
Ань серпасавны радейтiс ичöтсяньыс. Медводдза тöдчана уджыс — Ен Мамлöн öбраз, кодöс кызьысь унджык во сайын серпасавлiс ас сиктса аньлöн корöм серти. Тасянь и йитчис олöмыс Енкöд. Кымын водзö, сымын зумыдджыка сувтiс тайö ордым вылас. Пыр сöвмöдiс и серпасасян сямсö. Сылöн кияс улысь петiс, гашкö, сюрс сайö нин öбраз. Наöн тырвыйö могмöдiс Ручса кык да Кöрткерöс районысь Уръёльса вичкоясöс, кутшöмкö юкöн — Дереваннöйса да Керчомъяса вежа керкаясöс. Сöстöм мöвпъясöн да Енлысь бурсиöм корöмöн ставыс артмö кокниа да бура. Серпасасьöм кындзи сулалö службаяс вылын, вежа айяскöд ветлывлö Ручса да Дереваннöйса вичкоясö, сьылö клирос вылын. 
Ангелина Александровнаöн вежаинлы отсалöмыс — зэв тöдчана. Но сiйö донъясьтöг шуö, мый вöчö тайöс Енлы бур вöчöм да Сiйöс ни-мöдöм могысь. 
Галина НЕСТЕРОВА. 
Снимок вылын: А.А.Кирушева.

Комментарии:

Добавить комментарий

Свежий выпуск: 28 марта

Осторожно — мошенники!