Районса администрацияöн веськöдлысь С.В.Рубанлы. 
«Монди СЛПК» котырлы. 
«Парма гор» газетлы. 
«Трибуна» газетлы. 
Коми республикаса юралысьлöн интернет примитанiнö. 

Шыöдчöм 

Миянöс, Тимшерса олысьясöс, майшöдлö, мый июльсянь «Монди СЛПК» котыр босьтчас пöрöдчыны кöртымö босьтöм посёлокдорса вöр юкöнъясын. Тайö тимшерсаяслöн олöм вылö тöдчас лёк боксянь. Öти-кö, Тимшерсянь Мыс-öдз туй — «ыджыд му» вылö петан дзик öти туй. Сы кузя ветлö рейсöвöй автобус, челядьöс новлöдлöны школаö, ветлöны асланыс машинаясöн посёлоксаяс. Уналатi туйыс векни, став чукыльыс тырöма понöльöн да баддьöн, кодъяс сайысь локтысь машинаöс он казяв. Мöд-кö, абу бур Мыс дорын понтон, сiйöс колö дзоньтавны. Сы кузя позьö ветлыны сöмын 30 тоннаöдз машинаяслы, но мыйлакö тайö пасыс öнi абу. Коймöд-кö, миянлы эз юöртны, кыдзи кутасны заптыны да петкöдны вöр, лоас-ö посёлоксаяслы удж? Асшöр уджалысь В.А.Панюков лэдзис котырын уджалысьясöс вештытöм отпускö (тöвнас сы дорын уджалiс 60 морт), сы вöсна мый эз вермы босьтны пöрöдны косiнъясысь вöр юкöнъяс. Нёльöд-кö, вöр нэмыс вердö миянöс: сэтысь чукöртам тшак-вотöс, кыйсям. Кутасны кö пöрöдчыны тшака-вотöсаинъясысь, унаöн колясны сьöмтöг. 
Колö, мед вöр заптöм сетiс позянлун бурмöдны посёлокын олöм, отсавны йöзлы, а эз артмы мöдарö. Вöр пöрöдысь котыръяс волöны и мунöны, а миянлы танi овны. Ми бур туйяс, бур пос, уджалан местаяс, тшака-вотöсаинъяс вöсна.

Тимшер посёлокса олысьяс 
(сё сайö кырымпас).