[ A+ ] /[ A- ]

Ручысь Дарья Пименова помалiс 11 класс зарни медальöн, сылы вичмöдiсны коми кыв бура тöдöмысь и сьöм. 
9-11 классъясын сяма челядьлы лицейын джуджыда велöдiс физика да математика. Ворслiс волейболöн. Исласьö лыжиöн. Кор ставсö и вевъялö? 
Дзолядырсянь олö сиктын, пыр сёрнитö комиöн. Мамыс ичöтсянь чужтiс сы дорö муслун: лыддисны коми книгаяс. Кор мунiс школаö, эз весиг куж сёрнитны рочöн. Эз гöгöрволы математикаысь задачаяс да мамыс вуджöдлiс. 
11 классын велöдчыны вöлi ёна сьöкыд. Мед бура сдайтны экзаменъяс, ковмис ёна зiльны. Сылы зэв долыд, мый шедöдiс зарни медаль. 
— Школаысь волi нёль часын, сёйыштлi да гортса удж вöчи сёр рытöдз. Ёна корсьыси книгаясысь да интернетысь, видзöдалi видеоурокъяс. Гöгöрвои, мый велöдчöм да тöдöмлунъяс колöны аслым, — висьтасис Дарья. 
Кор велöдчис 8-öд классын, велöдысь Д.Н.Гребенюк вöзйис сылы петкöдчыны коми кыв кузя олимпиадаын. Дасьтысис ёна, лоис нёльöдöн. Шуис аслыс дасьтысьны бурджыка и 11 классын районын лоис медводдзаöн, а республикалöн тшупöдын мöдöн. 
— Коми кыв мен зэв муса, челядь кутасны сёрнитны комиöн. Ме лыддя, мый колö сёрнитны да тöдны чужан кыв, öд олам Коми республикаын. Дугöдчасны кö коми кывйысь, сiйö вермас вошны, — тöдчöдiс ныв. 
Водзö вылö Дарья кöсйö велöдчыны Сыктывкарын, но шуö, мый карын сылы сьöкыд, сынöдыс няйт, уна йöза. Велалiс овны вöр да ты дорын, кöнi чöскыд сынöд. 
Бать-мамыслы, Николай Ивановичлы да Елена Анатольевналы, нимкодь, мый налöн эм татшöм ныв. 
Гижöд да снимок 
Галина Клюжевалöн. 

Комментарии:

Добавить комментарий

Свежий выпуск: 28 марта

Осторожно — мошенники!