Дiасёръяысь Нина Егоровна Шатохина «Парма гор» газеткöд бур йитöда 2015-öд восянь. Сiйö посёлокса олöмаяслöн котырöн юрнуöдысь да медводз гижис котырö пырысь кыпыд лола йöзлöн водзмöстчöм йылысь. Гижö и посёлок да вöр овмöс сöвмöдöмö ыджыд пай пуктысьяс йылысь, кодъяс пасйöны 90 арöс тырöм. Ошкö зiль челядьöс, кодъяс отсасьöны олöма йöзлы.
— Ме вöчи посёлок йылысь альбом да сэтчö чукöрта Дiасёръя йылысь гижöдъяс. Кор воö «Парма гор» да сэнi кö эм посёлокса йöз йылысь гижöд, пыр жö котöрта библиотекаö, лэдза ксерокс пыр да, мортыс кö оз судзöд, газетсö сета сылы. Зiль челядьлы зэв воис сьöлöм выланыс ас йывсьыныс гижöд, водзö отсасьöны пöрысь йöзлы. Пелагея Ивановна Шебыревалöн шудысла, мый сiйöс эз вунöдны да пыдди пуктöны, петiс синваыс, кор асьсö аддзис газетлöн лист бокысь. Газетсö ыстiс Россияын олысь вокыслы. Миян ылi посёлокын олöм пуö да эм мый йылысь пасйыны, — сёрнитiс Н.Е.Шатохина.
Водзмöстчысь ань отсалiс А.Сугоровлы посёлоклöн олöм да йöз йылысь «Заново строй свою любовь» книга дасьтiгöн. Отсалö и «Парма гор» газетлы, юöртö Дiасёръяын выльторъяс йылысь.
Марина ДАДАШОВА. Снимок Татьяна ПОПОВАЛÖН.