Визинын чужöм Ольга Михайловна Кузнецова öкмыс во социальнöй уджалысь. Велöдчис почтаса уджалысь вылö да верöс сайö петöм бöрын мунiс сыкöд Керчомъяö, уджалiс кылöдчан участокын. Сылöн тупкысьöм бöрын вуджисны Кебанъёльö, кöнi олöны нин 14 во. Войнас видзис кылöдчан конторалысь эмбур, а сэсся лоис социальнöй уджалысьöн.
Сылöн видзöдлас улын öкмыс морт. Лунтыр кокъяс вылын, ветлöдлö асывсянь рытöдз. Ставыслöн пача керкаяс, пыртлö пес да ва. Таысь öтдор мыськалö джодж, ветлö лавкаö, аптекаö, отсалö чукöртны документъяс, тöвнас весалö лым.
— Меным тайö уджыс воö сьöлöм вылö. Пöрысьяс висьталöны асланыс олöм йылысь, велöдöны менö да унатор босьта аслым. Сьöкыд да, öти кадö кöсйи эновтчыны тайö уджысь, но кутчыси, а öнi сьöлöм вылын бур, мый кольччи. «Аслам» йöзкöд ёртася, корлöны весиг чужан лун вылас. Таысь нимкодь, — висьталiс О.М.Кузнецова.
Ольга Михайловна «Кебанъёль» овмöдчöминса депутат, олö посёлоксаяслöн тöждлунъясöн да отсалö налы. Аньлöн кык быдтас. 26 арöсаыс олö карын, а дас витаыс велöдчö школаын. Кад вичмигöн Ольга Михайловна кысьö, гожöм-арнас вотчö.
Гижöд да снимок Галина КЛЮЖЕВАЛÖН.