Геннадий Иванович Семёновлöн бать-мамыс во да джын эз тöдны, мый налöн пиыс ас окота серти мунiс Афганистанö. Кыдзи батьыс, кодi вöлi военнöйöн да уджавлiс Монголияын, конверт вылö гижлiс «Полевая почта», часьтлысь номерсö да юöртлiс, мый служитö Монголияын.
— Босьтiсны армияö 1984 вося октябрын. Веськалi Термесö салдатъясöс дасьтан полкö, велöдчи мина лыйлысьö. Локтан вося февральын нуисны Афганистанса Баграмö артиллерия дзоньталан батальонса лыйсьысьяслöн ротаö. Вöлi юкöнса командирöн да ротаса командирöс вежысьöн. Миян вотöдз сэнi ёна лыйсьöмаöсь, унаöн усьöмаöсь. Душманъяс ёна «кыйсисны» праздникъяс дырйи, шуам, май 1 либö ноябр 7 лунъясö, но ми тайöс тöдiм да пуля улö эг сюрöдчылöй. Кывкутiм, мед став öружие век вöлi дась, видзим тöдчанаинъяс. Бать-мамлы эг гиж, эг кöсйы дойдны мамлысь сьöлöмсö, öд ме кындзи гортын колисны куим чой да кык вок. Ме ачым Кöрткерöс районса Веселовкаысь, а велöдчи Мордiнын. И орчча батальонö веськалiс зон, кодкöд велöдчылiм öти классын. А сылöн мамыс велöдысь, кодi и висьталiс школаын велöдчысь чой-воклы, мый ме Афганистанын, — казьтылiс Геннадий Иванович, кодöс пасйисны «Воину-интернационалисту от благодарного афганского народа» да юбилейнöй медальясöн.
Чужанiнас бергöдчис 1986 вося ноябрын. 20 номера Сыктывкарса училищеын велöдчис водительö. Уджалiс «Комилеспром» котырын, кодi миян районын лесопунктъяслы вöчис вöр петкöдан туйяс, Кебанъёльын пуръясянiн. Кебанъёльö и вужъясис да лöсьöдiс семья. Öнi «Мондилы» медасьöм котырын, кодi вöчö вöр петкöдан туйяс.
Гижöд да снимок Марина ДАДАШОВАЛÖН.