Пожöгдiнысь Анастасия Николаевна Третьяковаöс 2013 воын бöрйисны старöстаöн да медводз шуис пелькöдны сиктнысö. Век петöны сöстöммöдчыны лым сылöм бöрын, тшöтш и орчча Малеын, пелькöдöны и шойна. «Пожöг» овмöдчöминлöн администрация вичмöдö новлыны лöп-ёг техника. Но йöзыс кыпалöны этшаöн. Та вöсна ковмис весиг эновтчыны мöсъяслы йирсянiн потшöмысь, кöть эськö видз-му овмöслöн кооператив могмöдлiс материалöн да техникаöн.
Анастасия Николаевна бур йитöд кутö меставывса асвеськöдлан котыркöд, кодöн юрнуöдö А.М.Шебырев. Найö öтув водзмöстчисны война вылын усьöмъяслы пас вöчöмöн, код вылö сьöм вичмис районсянь и республикасянь, чукöртiсны и сиктсаяслысь. Гöгöрсö потшисны да мавтiсны, мый гажöдö синъяс. Ань гожöмбыд видзöдö сы бöрся, выльмöдö дзоридзьяс, чарлаöн вундö быдмöм турун, ытшкыны корлö А.М.Шебыревöс.
Старöсталы отсасьöны сиктса юралысь Н.А.Шахова, клубöн веськöдлысь Е.Н.Лопырева, фельдшер М.В.Третьякова, сиктса депутат З.Е.Попова. Сиктсаяс нимсянь ёна гижасьлiсны республика тшупöдö, мед бурмöдiсны туйяс да лöсьöдiсны ю вомöн вуджанiн. «Йиыс» вöрзис: арнас вежлалiсны туй вомöн трубаяс, босьтчисны дзоньтавны понтон.
А.Н.Третьякова бурдöдчанiнын санитарка, корлöны отсасьны и Пожöгса бурдöдчанiнö. Вевъялö быдлаö.