Елена Владимировна Морозова чужлiс Вӧлӧгда обласьтса Великӧй Устюгын велӧдысьяслӧн семьяын. Помаліс шылад велöдан школа, сэсся шылад велöдан Сыктывкарса училище. Индісны уджавны Кулӧмдінӧ. 1982 восянь велӧдӧ челядьӧс ворсны фортепиано вылын. 1997 восянь шылад велöдан школаса директор. Сэні велӧдчысьяс петкӧдчӧны быдсяма конкурсъясын, весиг странаса да мирса тшупӧдъясын, шедӧдӧны дипломъяс, аттьӧалан гижӧдъяс. Елена Владимировналы нимкодь, мый школа помалысьяс Т.Ногиева, А.Старостина, А.Парахневич да В.Ракин нималӧны Россияын.Елена Владимировналы воӧ сьӧлӧм вылас челядькӧд удж. Шуӧ, мый велӧдны сьӧкыд, но сямман кӧ ышӧдны, ставыс артмö. Томъяс уджачӧсь, нырччысьӧсь, ыджыд кутöдаöсь, мый и колö енби сöвмöдiгöн.Шылад отсалö Елена Владимировналы аслыс: кор сьӧкыд, пуксьӧ фортепиано сайӧ, и став тӧжд-могыс лоӧ вены позянаӧн.

Гижӧд да снимок Галина Клюжевалöн.