Кулöмдiнысь Анна Ивановна Епова бура вöдитчö планшетöн, пыравлö тöдмавны бöръя юöръяс интернетö, тöдмалö кроссвордъяс. Миян волiгöн лыддьöдлiс компартиялöн райкомын водзтi уджалысьясöс. Он шу, мый сылы 95 арöс. Чужис Киров обласьтын. 1942 воын мунiс война вылö. Москва дорса Можайскын торъя армияын вöлi связьын уджалысьöн. 1947 воын Анна Ивановнаöс ыстiсны Нордвиг карö. Танi вöлi войвыв порт, вöчисны Войвыв Йиа океан пыр туй. Уджалiс радисткаöн. Войвылын и тöдмасис Сыктывкарса Юрий Иванович Еповкöд да öтлаасисны. 1948 воын воисны Коми муö. Овлiсны Лöгинъягын, Кебанъёльын, Кулöмдiнö вужъясисны 1964 воын. Уджавлiс библиотекаын, вöлi партиялöн райкомса инструкторöн, веськöдлiс öтувъя юкöнöн. Верöсыскöд чужтiс да ас олöмö петкöдiс куим челядьöс. Гозъя öтлаын олiсны 61 во. Анна Ивановналöн кöкъямыс внук да внучка, сизим правнук да правнучка, кодъяс кытшалöны тöждöн да радейтöмöн.

Ноябр 19 лунö олöма аньöс тшупöда пасöн нимöдiсны да сетiсны Россияса президент В.В.Путинсянь чолöмалан гижöд районса администрацияöн веськöдлысь С.В.Рубан, сiйöс вежысь Н.А.Левченко, олöмаяслöн районса котырöн юрнуöдысьöс вежысь И.З.Ахмадова, райсöветса депутат А.А.Кузнецова, «Кулöмдiн» овмöдчöминса администрацияöн веськöдлысьöс вежысь В.П.Нестеров, öтлаын уджав­лысьяс, матыссаяс да рöдвуж.

Гижöд да снимок Марина ДАДАШОВАЛÖН.