Дереваннöйысь Павла Андреевна Чувьюровлöн олöмыс кöть вöлi сьöкыд, но ань эз чорзьы сьöлöмнас, коли мелiöн да шаньöн. Чужлiс да быдмылiс танi. Дмитрий Андреевич верöсыскöд öтлаын олiсны 30 во, быдтiсны сизим нылöс да öти пиöс. Пыр видзлiсны куканьöс, ыжъясöс, но верöсыслöн кувсьöм бöрын ковмис дугöдчыны. Комынысь унджык во нин муса мортыс абу ловъя, пыр и олiс сэсся öтнас. Век волывлöны челядьыс, внук-внучкаясыс, правнук-правнучкаясыс, оз вунöдны сiйöс. Став ныв-пиыс Павла Андреевналöн пыдди пуктана йöз, найöс чужтöм-быдтöмысь нывбабаöс куимысь пасйылiсны «Мамлöн слава» медальöн. Ыджыд арлыд вылö видзöдтöг, П.А.Чувьюрова зэв чöскыда пусьö, ачыс этшаникöн вермö пыртлыны пес, ва. Но тайö — сöмын асьсö песыштöм могысь, сы вöсна мый мамсö öтырышъя дöзьöритö Наталья нылыс. Октябр 19 лунö Павла Андреевнаöс волiсны чолöмавны 90 арöсöн став ныв-пиыс, овмöдчöминса öнiя да вöвлöм юралысьяс Е.В.Булышева да Н.Б.Есев, олöмаяслöн районса сöветöн юрнуöдысьöс вежысь И.З.Ахмадова да мукöд. П.А.Чувьюроваöс чолöмалiс да сетiс В.В.Путинсянь чолöмалан гижöд да козин районса администрацияöн веськöдлысьöс вежысь Н.А.Чаланова, Павла Андреевналöн внучкаыс. Быд воысь сиис олöма аньлы ён дзоньвидзалун, кыпыд лов, кузь нэм да бур шуд.
Гижöд Галина КЛЮЖЕВАЛÖН.
Снимок Кирилл ПОПОВЛÖН.